Azərbaycan Premyer Liqasında oynamış futbolçu Dmitri Kruqlov Estoniya milli komandasının heyətində fərqlənib. Sportnet.az-ın məlumatına görə, 32 yaşlı sol cinah oyunçusu Andorra yığması ilə yoldaşlıq görüşündə 2:0 hesablı qələbədə əsas pay sahiblərindən olub.
Kruqlov Tallində keçirilən oyunun 24-cü dəqiqəsində hesabı açıb. Andorra bu matçdan öncə Avstriyada Azərbaycan milli komandası ilə yoldaşlıq görüşü keçirərək qolsuz bərabərliyə qalmışdı. Kruqlov klublarımızdan "Neftçi", "İnter" və "Rəvan"da oynayıb, çempionatımızın mükafatçısı olub. O, "Qəbələ"nin hücumçusu Sergey Zenyovla millidə komanda yoldaşıdır. Ancaq Zenyov bu matçın iştirakçısı olmayıb.
