Avropa Liqasında Azərbaycanı təmsil edəcək "Qəbələ” heyətinə daha bir yeni futbolçu qatıb. Sportnet.az-ın məlumatına görə, "qırmızı-qaralar” hücum xəttini fransalı Baqali Dabo ilə gücləndirib.
28 yaşlı Seneqal əsilli ön xətt oyunçusu ilə 2 illik müqavilə imzalanıb. Futbolçunun adı "Qəbələ”nin UEFA Avropa Liqasında iştirak ərizəsinə əlavə edilib. Bununla da Dabo sabah "Samtredia" ilə Avroliqa matçında meydana çıxa biləcək.
"Loryan” klubunun yetirməsi olan Dabo karyerası ərzində "İvri” (2008-2011), "Kretey” (2011-2013, 2014-2016) və "İstr” (2013-2014) klublarının şərəfini qoruyub. Son 2 mövsümdə Fransa çempionatının 2-ci liqasında çıxış edən təcrübəli hücumçu "Kretey”də keçirdiyi 57 oyunda 6 qol vurub. Ümumiyyətlə isə Baqali bu liqada 87 matç keçirib, 11 dəfə rəqib qapılarına yol tapıb.
