"Qəbələ” klubu Avropa Liqasının II təsnifat mərhələsinin ilk oyununun hazırlığını tamamlayıb. Sportnet.az-ın məlumatına görə, Macarıstan MTK-sı ilə səfər matçının hazırlığına Bakıda start verən "qırmızı-qaralar”ın oyunöncəsi son məşqi Dyer şəhərində baş tutub.
Roman Qroqorçukun yetirmələri qarşılaşmadan bir gün öncə matçın keçiriləcəyi "Dyirmot” stadionunda məşq edib. Komandamız məşq prosesində toplu çalışmalara üstünlük verib. Oyunöncəsi Qriqorçukun mətbuat konfransı gözlənilsə də, bu, gerçəkləşməyib.
Qeyd edək ki, Dyer şəhərinin "Dyirmot” stadionunda baş tutacaq MTK – "Qəbələ” oyunu Bakı vaxtı ilə saat 22:30-da başlayacaq.
