Bu gün "Qarabağ" klubu Avropa Liqasının "pley-off" mərhələsində İsveçin "Göteborq" klubu ilə cavab matçına çıxıb. Sportnet.az-ın məlumatına görə, "köhlən atlar" doğma azarkeşlər önündə qələbə qazanaraq Avropa Liqasının qrup mərhələsinə vəsiqə qazanıb.
İlk olaraq topa meydan sahibləri toxunub. Oyunun əvvəllərindən rəqibi təzyiq altında saxlayan Qurban Qurbanovun rəhbərlik etdiyi komanda istəyinə maçtın 19-cu dəqiqəsində çatıb. Riçard Almeydanın künc zərbəsindən "Azərbaycansayağı ötürmə"sini kapitan Rəşad Sadıqov Con Alvbagenin qoruduğu qapıdan keçirib. Üstünlüyünü artıran meydan sahibləri 7 dəqiqə sonra azarkeşləri bir daha sevindirib. 26-cı dəqiqədə Dani Kintananın ötürməsini Muarem Muarem boş qapıya göndərərək hesab arasındakı fərqi artırıb. Oyunun 41-ci dəqiqəsində Muarem topu yenidən qapıya göndərsə də rusiyalı referi Vladislav Bezborodov epizodu oyundankənar vəziyyət kimi qiymətləndirib və qol qeydə alınmayıb. İlk hissə bu hesabla da başa çatıb.
İkinci hissədə topu qonaqlar oyuna daxil edib. Meydan sahibləri üstünlüyünü ikinci yarıda da davam etdirib. Oyunun 51-ci dəqiqəsində Muaremin ötürməsini Dani Kintana rəqib qapısına göndərib - 3:0. Oyunun qalan dəqiqələrində qapılara qol vurulmayıb.
İsveçdə keçirilmiş ilk oyunda 0:1 hesabı ilə məğlub olan "Qarabağ" 3:0 hesablı qələbə sayəsində ardıcıl 3-cü dəfə Avropa Liqasının qrup mərhələsinə vəsiqə qazanıb.
Avropa Liqası, "pley-off" mərhələsi, cavab oyunları
20:30. "Qarabağ" (Azərbaycan) - "Göteborq" (İsveç) - 3:0
Qollar: Rəşad Sadıqov, 19. Muarem Muarem, 26. Dani Kintana, 51
Baş hakim: Vladislav Bezborodov
Yan xətt hakimləri: Valeri Dançenko, Maksim Qavrilin
Dördüncü hakim: Kiril Levnikov (hamısı Rusiya)
UEFA nümayəndəsi: Maykl Tomas Ross (Şimali İrlandiya)
Hakim-inspektor: Coni Vanspauen (Belçika)
Bakı. Tofiq Bəhramov adına Respublika Stadionu
İlk oyun - 0:1
