Azərbaycan milli komandasının üzvü Ruslan Qurbanov futbol tariximizə düşüb. Sportnet.az-ın məlumatına görə, 25 yaşlı hücumçu avrokuboklarda 1 mövsümdə 2 klubumuzda qol vuran ilk futbolçu olub. Ölkəmizin 1994-cü ildə təmsil olunduğu avrokuboklarda hələ belə göstəriyə imza atan oyunçusu olmamışdı.
Hər 2 qolunu bu il vuran Ruslan əvvəlcə "Neftçi"nin heyətində Avropa Liqasının I təsnifat mərhələsində Maltada "Baltsan”a 2:0 hesabı ilə qalib gəldiyimiz ilk matçda fərqlənib. Qurbanov bundan sonra keçdiyi "Qəbələ”də qrup mərhələsindin II turunda Almaniyanın "Maynts” klubuna 2:3 hesabı ilə uduzduğumuz matçda rəqib qapısına yol tapıb. O, hər 2 halda penaltidən fərqlənib.
Qurbanov "Qəbələ”nin penaltidən qol vuran 3-cü futbolçusu olub. Bunadək 2 dəfə 11 metrlik cərimə zərbəsini sabiq kapitan Cavid Hüseynov reallaşdırıb. O, ötən yay Avroliqanın II təsnifat mərhəlsində Kiprin APOEl klubu ilə matçlarda bunu edib.
Ruslan qrupda penaltidən fərqlənən 2-ci futbolçumuz olub. İlk penaltini ötən mövsüm ilk turda "Qarabağ”ın braziliyalı yarımmüdafiəçisi Riçard Almeyda "Tottenhem”lə Londondakı matçda hesabı açarkən reallaşdırıb.
Ruslan qrupda qol vuran ilk, ümumilikdə 4-cü azərbaycanlı futbolçu olub. Onun komanda yoldaşı Rəşad Sadiqov "Neftçi”nin kaptanı kimi "İnter"ə Milanda baxımlı qol vurmaqla tarixə düşüb. "Qarabağ”ın debüt mövsümündə hücumçusu Vüqar Nadirov Fransada "Sen-Etyen”ə qol vurub. Ötən mövsümkü təmsilçilərimiz "Qarabağ”la "Qəbələ”dən yerli oyunçu fərqlənməmişdi. Bu il isə "Qarabağ”ın kapitanı Rəşad Sadıqov "Slovan”la "Dalğa Arena”da 2:2 hesabı ilə nəticələnən matçda qol vurub.
Ruslan "Qəbələ”nin tarixində avrokuboklarda qol hesabını açan 12-ci futbolçu olub. Komandanın avrokuboklarda ilk qolunun müəllifi də Cavid Hüseynov olub. Onun hesabında 3 qol var. "Qırmızı-qaralar"dan dirgər fərqlənənlər estoniyalı Sergey Zenyov (6), liberiyalı Teo Uiks (5), braziliyalı Luis Hilario Dodo (4), fransalı Baqali Dabo (3)ukraynalılar Aleksey Antonovla Vitali Vernidub serbiyalı Vojislav Stankoviç, xorvatiyaı Filip Ozobiç, gürcü Nika Kvekveskiri və Asif Məmmədov (hərəyə 1 dəfə) olublar.
Mehman SÜLEYMANOV
