"Gəncəyə gəlişimizin səbəbi aşağı yaş qrupları üzrə komandalara baxmaq, məşqçilərin gördüyü işə nəzarət etmək və məşq şəraiti ilə tanış olmaq idi". Sportnet.az-ın məlumatına görə, bu fikirləri AFFA-nın Məşqçilər Komitəsinin üzvü Şakir Qəribov "Kəpəz" klubunun rəsmi saytına açıqlamasında bildirib.
Bu günlərdə AFFA-nın Məşqçilər Komitəsinin üzvləri Gəncəyə səfər edərək "Kəpəz”in aşağı yaş qrupları üzrə komandaları ilə maraqlanıb, yerindəcə şəraitlə tanış olublar. Vaxtilə Gəncədə futbol oynamış Qəribov Gəncənin Azərbaycan futboluna verdiyi töhfələrin məlum olduğunu, "Kəpəz”in yetişdirdiyi futbolçuların istedadı, bacarığı ilə seçildiyini söyləyib: "Biz tərəfdən nə kömək lazımdırsa, onu etməyə çalışırıq ki, Nizami yurdundan yenə yaxşı oyunçular çıxsın. Hamımız birlikdə ölkə futbolunun inkişafına çalışırıq. Buradakı məşqçilərin işləmək həvəsi çoxdur, çalışırlar, amma bunun üçün uyğun şərait yoxdur”.
Təcrübəli mütəxəssis "Kəpəz”in əsas komandasının Premyer Liqadakı çıxışına da toxunub: "Komandanın çıxışını izləyirik. İlk mövsümün yekunlarına əsasən, "Kəpəz”in Avropa Liqasına vəsiqə qazanması və ilk mərhələni adlaması sevindiricidir. Dəstək daha çox olsa, kollektiv bundan da yaxşı nəticələr göstərə bilər. Məncə, diqqət olarsa, komanda "Qarabağ” və "Qəbələ” kimi uğurlu nəticələrə imza atmaq imkanı qazanar”.
Qəribov Gəncə futbolsevərlərinin "sarı-göylər”in ev oyunlarında çoxluq təşkil etməsinə də münasibət bildirib. O, azarkeşlərin "Kəpəz”i çox sevdiyini deyib: "Mən özüm futbola Gəncədə başlayıb elə burada da karyeramı başa vurmuşam. "Kəpəz”in azarkeşlərindən heç bir yerdə yoxdur. Çempionat oyunları da göstərir ki, insanlar futbolu, komandanı necə sevirlər. Hər oyuna ən azı 10 000 tamaşaçı gəlir. Bu, çempionatımız üçün rekord göstəricidir. Gəncədə həmişə futbol olub və olacaq da”.
60 yaşlı mütəxəssis indi "Kəpəz”in heyətində yerli futbol məktəbinin yetirmələrinin az olmasına da diqqət çəkib. O, tezliklə bu çatışmazlığın aradan qalxacağına ümid etdiyini söyləyib: "Mütəxəssis olaraq öz aramızda bu haqda danışmışıq. İki gün ərzində komandanın aşağı yaş qruplarında çıxış edən uşaqlara nəzər saldıq. Perspektivlilər var, onlar yetişəcəklər. Bir balaca şərait yaratmaq lazımdır. Şərait deyəndə ki, meydança, top və forma olmalıdır. Ayrı böyük bir şey tələb olunmur. Komanda iki ildir elitada oynayır, qoy bir müddət keçsin, yerli futbolçuları yenidən görəcəyik. Sadəcə, zaman lazımdır. Gəncədə yetişən uşaqların milli komandalara kimi gedəcəyinə inanıram”.
