Azərbaycan Premyer Liqasının cari mövsümündə qırmızı vərəqələrin sayı artır. Sportnet.az-ın məlumatına görə, bu çempionatda ilk dəfə son turda iki "qırmızı" birdən qeydə alınıb. Buna "Qəbələ"nin müdafiəçisi Sadiq Quliyevlə "Neftçi"nin rumıniyalı hücumçusu Katalin Tira uzatma dəqiqələrində imza atıblar.
Ötən mövsümü icarə əsaəsnda "Zirə"də keçirən Quliyev yetirməsi olduğu "Qəbələ"yə dönüşünü belə qeyd edib. Özü də 61-ci dəqiqədə meydana daxil olan gənc müdafiəçi bundan 20 dəqiqə baş hakim Rəhim Həsənov tərəfindən ilk sarı vərəqəni alıb. O, 90+3-cü dəqiqədə cərimə meydanında aşkar əllə oyuna görə qırmızı vərəqə alıb və "Sumqayıt" təyin olunan penaltini qola çevirərək məğlubiyyətdən xilas olub - 2:2.
Tiranın "qırmızı"sı isə tam fərqli olub. Belə ki, legioner 90+2-ci dəqiqədə meydana girən azarkeşin üzərinə cumub və ona qarşı təcavuz davranışına görə baş hakim Ramil Diniyevdən birbaşa qırmızı vərəqə alıb.
Bununla da cari çempionatda meydandan qovulanların sayı 5-ə çatıb. Bu göstəricidə lider elə "Neftçi"dir - 3 nəfər. Əvvəlki qovulanlar müdafiəçilər - braziliyalı Jayro Rodrigeslə Rahil Məmmədov olub. Onlar müvafiq olaraq AZAL-la "Zirə" ilə səfər matçlarında 2-ci sarı vərəqəyə görə meydandan çıxarılıblar. AZAL-ın hücumçusu Ruslan Nəsirli isə ilk turda rəqibi vurduğuna görə birbaşa qırmızı vərəqə alıb. Ancaq AFFA-nın İntizam Komitəsi ona 2 oyunluq cəza vermişdi. Tira isə həmin qurum tərəfindən ən ağır cəzalanan futbolçu olub - 5 oyun, 2400 manat.
Bu turda elə "Neftçi" - Qarabağ" matçında avtoqol da qeydə alınıb. Rodriges bu çemoionatda təkcə qırmızı vərəqə almaqla yox, topu öz qapısına göndərməklə də seçilir. Özü də cari çempionatda avtoqol edən yalnız odur və bunu artıq 3-cü dəfə reallaşdırıb. Bunlardan 2-si isə məhz "Qarabağ"la oyunlara təsadüf edib.
