Türkiyə Super Liqasının XII turunda keçirilən "Qalatasaray" - "Bursaspor" (3:1) matçı yerli mətbuatda geniş yer alıb.
Sportnet.az-ın məlumatına görə, bu ölkənin mediasında Azərbaycan milli komandasının futbolçusu Deniz Yılmaz tənqid edilib.
Türkiyəli həmkarlarımız "Bursaspor"un hücumçusunun qol vurmağı unutduğunu qeyd edib:
"Ötən mövsüm 13 oyunda 6 qol və 4 məhsuldar ötürmə ilə yadda qalan Deniz Yılmaz bu mövsüm qol vurmağı unudub. 28 yaşlı hücumçu uzunmüddətli zədənin ardından 7-ci həftədə baş tutan "Osmanlıspor" matçı ilə geri dönüb. Sonuncu dəfə ötən mövsümün 33-cü həftəsindəki "Konyaspor" qarşılaşmasında fərqlənən futbolçu cari mövsümdə qol hesabını aça bilməyib".
Qeyd edək ki, Yılmaz milliyətcə türk olsa da, Almaniyada doğulub boya-başa çatıb və futbolda ilk addımlarını orada atıb. 28 yaşlı hücumçu 2013-cü ildən karyerasını Türkiyədə davam etdirir. Deniz Azərbaycan vətəndaşlığını qəbul etdiyinə görə hazırda klubunda legioner sayılır.
