"Qarabağ"ın Avropa Liqasının qrup mərhələsinin son tur oyununda üz-üzə gələcəyi İtaliyanın "Fiorentina" klubu kapitanı Qonsalo Rodrigesi itirmək üzrədir. Sportnet.az-ın məlumatına görə, 32 yaşlı argentinalı müdafiəçi ilə yeni müqavilə imzalanmadığından, onun gedişi gündəmə gəlib.
Rodrigesin 2012-ci ildən şərəfini qoruduğu (144 oyun, 21 qol) Florensiya təmsilçisi ilə müqaviləsi gələn yay bitir. Futbolçunun agenti Xose İqlesias qalmaqallı açıqlama verərək anlaşmanın artırılması ilə bağlı razılığının olmadığını bidirib: "Danışıqlar başlayandan "Fiorentina" bir sm də hərəkət etməyib. Belə görünür ki, klub Qonsalonun onun qarşısında xidmətlərini başa düşmür və nələr etdiyini dərk etmir. Şəxsən mən təəccüblənmişəm. "Fiorentina"nın hazırda təklif etdiyi şərtlərlə Qonsalo müqaviləni uzatmayacaq. O, hazırkı şərtlərlə yeni anlaşma imzalaya bilərdi, ancaq "Fiorentina" bunu iqtisadi cəhətdən sərfəli hesab etmir. Çətin ki, biz danışıqlar apardıq. Mən Argentinaya qayıdıram. Sonda biz digər klubların təkliflərini alacağıq".
Qeyd edək ki, "Qarabağ" "Fiorentina" ilə dekabrın 8-də evdə görüşəcək. Bu komandalar J qrupunda 5 turdan sonra ilk 2 pillədə olsalar da, hələ 1/16 finala vəsiqəni rəsmiləşdirməyiblər.
