"Qəbələ" klubu cari mövsümdə ilk dəfə meydanı xalsız tərk edib. Sportnet.az-ın məlumatına görə, Azərbaycan Premyer Liqasının XIII turunun "Qarabağ"la səfər matçında 1:2 hesabı ilə uduzan "qırmızı-qaralar" mövsümdə ilk dəfə xalsız qalıb.
Roman Qriqorçukun rəhbərlik etdiyi komandanın son yenilgisi ötən mövsümün XXXIV turuna təsadüf edib. Həmin vaxt da "Qarabağ"la səfər oyununda xalsız qalan qəbələlilər 0:2 hesabı ilə uduzub. Mayın 11-dəki məğlubiyyətdən sonra "qırmızı-qaralar" keçirdiyi 14 qarşılaşmada 10 qələbə qazanıb, 4 heç-heçə edib.
202 gündən sonra xalsız qalan əyalət klubu öz tarixində 3-cü nəticəyə imza atıb. "Qəbələ" 2011-ci ildə ardıcıl 16 görüşdə uduzmayıb ki, bu rekordu təkrarlamaq üçün komandaya iki matç çatmayıb. Ötən il isə "qırmızı-qaralar" 15 oyundan ibarət seriyaya imza atıb.
