Azərbaycan Kubokunun 1/8 final mərhələsində "Qəbələ" evdə I divizion təmsilçisi "Zaqatala"nı qəbul edib. Sportnet.az-ın məlumatına görə, Premyer Liqanın liderlərindən olan "qırmızı-qaralar" çətin qələbə qazanıb.
Oyunda qalibi müəyyənləşdirmək üçün əlavə vaxt təyin olunub. Çünki 90 dəqiqəlik mübarizə 2:2 hesabı ilə nəticələnib. Oyunda hesabı 12-ci dəqiqədə meydan sahiblərinin serbiyalı müdafiəçisi Vojislav Stankoviç açıb. Qonalqar bundan 20 dəqiqə sonra Sərxan Abdullayevlə bərabərlik qolunu vurub. "Qəbələ" 45+1-ci dəqiqədə Rəşad Eyyubovun penalti zərbəsi ilə hesabda yenidən irəli çıxıb. Qarşılaşmanın 64-cü dəqiqədə Orcuc Balaşlı "Zaqatala"nın növbəti dəfə hesabı bərabərləşdirməsinə imkan yaradıb.
Təyin olunan 30 dəqiqəlik əlavə vaxtda qol vurulmayıb. "Qəbələ" oyunsonrası penaılti seriyasında 4:1, ümumilikdə 6:3 hesabı ilə qalib gələrək sensasiyaya imkan verməyib. Roman Qriqorçukun komandasının 1/4 finalda rəqibi AZAL olacaq.
