"Qarabağ" və "Qəbələ"nin Avropa Liqasının qrup mərhələsinin son turundakı oyunlarına təyinat alan hakimlər artıq Azərbaycan futboluna tanışdır. Sportnet.az-ın məlumatına görə, Bakıda İtaliya "Fiorentina"sı ilə keçiriləcək qarşılaşmada iş başında olacaq xirvatiyalı İvan Bebek iki dəfə Azərbaycan klubunun matçında olub.
Ötən mövsüm Avropa Liqasının qrup mərhələsində Bakıda "Qəbələ" və Almaniya "Borussiya"sı arasında keçirilən oyunu idarə edən Bebek əlini 4 dəfə cibinə atıb. FİFA referisi hərəyə 2 sarı vərəqə göstərib. Həmin qarşılaşma Dortmund klubunun 3:1 hesablı qələbəsi ilə yekunlaşıb. 39 yaşlı referi 2005/2006 mövsümündə isə "Neftçi"nin Çempionlar Liqasının I təsnifat mərhələsindəki oyununa təyinat alıb. İslaniyanın "Hafnarfyordyur" komandasına qarşı Bakıda baş tutmuş görüşdə meydan sahibləri 2:0 hesablı qələbəyə sevinib. Bu görüşdə 2 dəfə rəqib, bir dəfə isə ev sahibi komandanın futbolçusu sarı vərəqə alıb.
Bebek həm də Azərbaycan millisinin 2008-ci il Avropa çempionatının seçmə qrup mərhələsində Portuqaliya ilə Bakıda keçirdiyi qarşılaşmanı idarə edib. 2007-ci il oktyabrın 13-də elə Respublika stadionunda baş tutmuş görüşdə qonaqlar qalib gəlib - 2:0. Bu görüşdə millimizin artıq karyerasını başa vuran müdafiəçisi Aslan Kərimov dünyanın ən güclü futbolçusu Kriştianu Ronalduya dirsək ataraq, onu yerə sərdiyi üçün qırmızı vərəqə alıb.
Almaniyada baş tutacaq "Maynts" - "Qəbələ" matçını idarə edəcək uelsi Simon Lee Evans isə bir dəfə Bakıda olub. O, 2012/2013 mövsümündə Avropa Liqasının qrup mərhələsində "Neftçi" və Serbiya "Partizan"ı arasındakı matçı idarə edib. Həmin qarşılaşma 1:1 hesabı ilə yekunlaşıb. 41 yaşlı baş hakim əlini 9 dəfə cibinə atıb. Hər komandaya 4 sarı vərəqə göstərən uelsi referi bir dəfə də "Partizan"ın futbolçusunu "qırmızı" ilə cəzalandırıb.
