Bu gün futbol üzrə Azərbaycan Premyer Liqasında 2016-cı ilin son turunun oyunları keçirilib. Sportnet.az-ın məlumatına görə, tura Qəbələdə start verilib.
"Qəbələ" Gəncənin "Kəpəz" klubunu sınağa çəkib. Oyunda üç qol vurulub. Qollardan ikisi meydan sahiblərinin, biri isə qonaqların aktivinə yazılıb. Qapılara hər üç top on bir metrlik cərimə zərbəsindən vurulub. Bununla da "Qəbələ" 31 xalla 2-ci, "Kəpəz" isə 15 xalla 5-ci pillədə yer alıb.
Növbəti oyunda paytaxın "Neftçi" və AZAL komandaları qarşılaşıb. "Dalğa Arena"da keçirilən qarşılaşmada bir qol vurulub. "Təyyarəçilər"in heyətində David Canalidze 80-ci dəqiqədə komandasına 3 xal qazandıran qola imza atıb. Oyun AZAL-ın 1:0 hesablı qələbəsi ilə də başa çatıb. Bu nəticədən sonra da Şüvəlan təmsilçisi 8 xalla sonuncu pillədə qərarlaşıb. "Neftçi" isə 9 xalla 7-cidir.
"Sumqayıt" öz meydanında "Zirə"ni sınağa çəkib. Oyunun 15-ci dəqiqəsində meydan sahibləri qol vurmağı bacarıb. 1:0 hesablı qələbə Sumqayıtın eyniadlı təmsilçisini 4-cü pilləyə yüksəldib. "Zirə" isə bir pillə geriləyərək 6-cı olub.
Premyer Liqada 2016-cı ilin son oyunu "Azərsun Arena"da olub. "Qarabağ" Bakının "İnter" klubu ilə münasibətlərinə aydınlıq gətirib. Qış fasiləsindən öncə Premyer Liqada baş tutmuş son görüşdə qapılara qol vurulmayıb. Komandalar nə qədər çalışsalar da, oyunda hesab açılmayıb. 14 oyuna 32 xal toplayan "Qarabağ" ili birinci pillədə başa vurub. Bakının "İnter" klubu ilə isə 25 xalla 3-cü pillədə möhkəmlənib.
Azərbaycan Premyer Liqası, XIV tur
17 dekabr
14:00. "Qəbələ" - "Kəpəz" - 2:1
Qol: Filip Ozobiç, 23-penalti ilə. Ruslan Qurbanov, 84-penalti ilə - Tural Axundov, 78-penalti ilə
Qırmızı vərəqə: Renan Silva, 83 ("Kəpəz")
Hakimlər: Əliyar Ağayev, Rza Məmmədov, Rahil Ramazanov, Ziya Nəsirov
AFFA nümayəndəsi: Eldar Qasımov
Hakim-inspektor: Murad Məmmədov
Qəbələ şəhər stadionu
16:00. "Sumqayıt" - "Zirə" - 1:0
Qol: Mirabdulla Abbasov, 15
Hakimlər: Ömər Paşayev, Mehman Mahmudov, Vüqar Bayramov, Nahid Əliyev
Əlavə köməkçi hakimlər: Rəhim Həsənov, Rəvan Həmzəzadə
AFFA nümayəndəsi: Mübariz Hüseynov
Hakim-inspektor: Kərim Ağayev
"Kapital Bank Arena"
16:00. "Neftçi" - AZAL - 0:1
Qol: David Canalidze, 80
Hakimlər: Rauf Cabbarov, Mübariz Haşımov, Vüsal Qənbərov, Elman Musayev
Əlavə köməkçi hakimlər: Elvin Əsgərov, Ramil Əhmədov
AFFA nümayəndəsi: Rauf Əmirov
Hakim-inspektor: Əhmədağa Cabbarov
"Dalğa Arena"
17:00. "Qarabağ" - "İnter" - 0:0
Hakimlər: Fariz Yusifov, Namiq Hüseynov, Akif Əmirəli, Yaşar Abbasov
Əlavə köməkçi hakimlər: Ramil Diniyev, İnqilab Məmmədov
AFFA nümayəndəsi: Eldəniz Musayev
Hakim-inspektor: Vüsal Əliyev
"Azersun Arena" ("CBC Sport”, canlı)
