Bu gün klublarası dünya çempionatının qalibi müəyyənləşib. Sportnet.az-ın məlumatına görə, "Real Madrid" tarixində 2-ci dəfə buna nail olub.
İspaniya nəhəngi az öncə yekunlaşan final matçında meydan sahiblərinə - Yaponiyanın "Kaşima Antlers" klubuna 4:2 hesabı ilə qalib gəlib. Düzdür, Madrid təmsilçisi buna heç də asan nail olmayıb. Bürünc medal uğrunda matçda olduğu kimi, final oyununda da əsas vaxt 2:2 hesabı ilə yekunlaşıb. Özü də "Real Madrid" ikinci hissənin əvvəlində 8 dəqiqəyə buraxdığı 2 qolla hesabda geridə düşüb. Ancaq komandanın portuqaliyalı bombardiri Kriştianu Ronaldu hesabı bərabərləşdirə bilib. Bu il dünyanın ən yaxşı futbolçusu seçilən 31 yaşlı hücumçu əlavə vaxtda daha 2 qol vuraraq həm het-trik edib, həm də komandasına 2014-cu ildən sonra 2-ci dəfə dünya çempionluğu qazandırıb.
Qeyd edək ki, bu turniri ən çox - 3 dəfə (2009, 2011 və 2015) qazanan "Real Madrid"in əzəli rəqibi, İspaniyanın digər nəhəngi "Barselona"dır.
Klublarası dünya çempionatı
Final
18 dekabr
"Real Madrid" (İspaniya) - "Kaşima Antlers" (Yaponiya) - 4:2 (əlavə vaxtda - 4:2)
Qollar: Kərim Benzema, 9, Kriştianu Ronaldu, 60-pen, 98, 104 - Gaku Şibasaki, 44, 52
