"Hələ ki yeni transferimiz yoxdur. Ancaq təbii ki, olacaq. Keçid dəqiqləşmədən ad çəkmək istəmirəm". Bu fikirləri Sportnet.az-a açıqlamasında "Neftçi"nin baş məşqçisi Elxan Abdullayev bildirib.
Qış fasiləsində gürcü müdafiəçi Georgi Navalovski ilə hücumçu Namiq Ələsgərovun keçidini həll edən "ağ-qaralar"ın çoxsaylı transferlərə imza atması gözlənilir. Abdullayev bunun üçün bir qədər gözləməyi daha məqsədəuyğun sayır: "Müqavilə imzalayan futbolçunun transferini təsdiqləmək olur. Ancaq bu olmadıqda danışmaq sadəcə, müzakirə olacaq. Bu zaman uzun-uzadı danışa bilərik, ancaq ortada real bir şey olmur".
"Neftçi"nin ətrafında bir sıra futbolçuların, o cümlədən milli komandamızın üzvlərinin adları hallanır. Abdullayevin sözlərinə görə, növbəti transferlərə yeni ilədək tam aydınlıq gələcək.
Xatırladaq ki, "ağ-qaralar" yanvarın 4-də Antalyaya təlim-məşq toplanışına yollanacaq.
