"Yaxşı təəssüratlarla vətənə dönmüşük. Əvvəlcədən yarış təşkilatçılarına minnətdarlığımı bildirirəm ki, ötənlərin məşhur futbolçularını bir yerə yığmışdılar. Turnir yüksək səviyyədə təşkil olunmuşdu". Sportnet.az-ın məlumatına görə, Gürcüstanın paytaxtı Tbilisidə keçirilən "Qış Kuboku" turnirində iştirak edən bunu futbol veteranlarından ibarət Azərbaycan millisinin üzvü Vidadi Rzayev "Kəpəz" klubunun rəsmi saytına açıqlamasında deyib.
O, 1 il əvvəl faciəvi şəkildə dünyasını dəyişmiş sabiq futbolçu və UEFA meneceri David Petriaşvilinin xatirəsinə həsr beynəlxalq mini-futbol yarışı haqda bunları bildirib: "Rəqiblərimizdən Ukrayna və İspaniya yığmalarının heyətində dövrünün ən güclü futbolçuları yer almışdı. Onlara qarşı mübarizə aparmaq bizə gözəl hisslər yaşatdı. Belə yarışlarda əsas önəmli olan veteranların bir araya gəlməsidir. Oyunlardan sonra ziyafət təşkil olunmuşdu. Bir sözlə, hər şey ürəyimizcə idi”.
V.Rzayev "Qış Kuboku”nda uzun müddət üzlərini görmədikləri tanışları ilə görüşdüklərini söyləyib: "Gürcülər turnirə çox güclü heyətlə qatılmışdılar və elə bununda nəticəsində çempion oldular. Vaxtilə Türkiyənin "Ərzurumspor” klubunda mənimlə bir yerdə oynamış, amma soyadını xatırlamadığım David adlı komanda yoldaşımla görüşdüm. Əvvəllər bir-birimizə rəqib olmuş oyunçularla danışıb, söhbət etdik. Onları yenidən görmək xoş oldu”.
Gəncə klubunda 19 yaşlı futbolçulardan ibarət komandanın baş məşqçisi bu cür yarışların mütəmadi keçirilməsini istədiyini bildirib və veteranların bir araya gətirmək üçün təklifini də irəli sürüb: "Futbol biz veteranları birləşdirən dəyərdir. Odur ki, belə turnirlərin keçirilməsini müsbət qiymətləndirirəm. Düşünürəm ki, bu kimi yarışlar tez-tez təşkil olunsa, daha yaxşı olar. Gürcüstan, İspaniya, Rusiya və Ukraynada veteranlar arasında çempionatlar keçirilir. Düzdür, bir ara Qəbələ, Oğuz, Naxçıvan və digər yerlərdə gedib oynadıq. Müntəzəm çempionat keçirilsə, veteranlardan ibarət yığmamız da xarici turnirlərə daha hazırlıqlı gedər və nəticə də qazanar (gülür)”.
Qeyd edək ki, turnirdə Gürcüstan, Azərbaycan, İspaniya, Türkiyə, Ukrayna və UEFA-nın yığma komandası iştirak edib. Millimiz qrupda iki oyun keçirib. Yığmamız qrup mərhələsində İspaniya (2:5) və Ukraynanın (3:3) futbol veteranları ilə mübarizə aparıb.
