Türkiyənin "Gənclərbirliyi" klubunun prezidenti İlhan Cavcav vəfat edib. Sportnet.az-ın məlumatına görə, Cavcav müalicə aldığı Ankara xəstəxanasında 81 yaşında ikən dünyasını dəyişib.
Şəkərli diabet, hipertoniya, xroniki ağciyər xəstəliyi, böyrək çatışmazlığı olan klub rəhbərinin müayinə və müalicələrdən sonra beyninə qan sızıb. O, ötən gün xəstəxanada reanimasiya şöbəsinə yerləşdirilsə də, həkimlərin səylərinə baxmayaraq, nəticə hasil olunmayıb.
Dəfn mərasimi sabah mərhumun komanda üçün tikdirdiyi Baştəpə bazasında olacaq. Klub rəhbərinin ölümü ilə əlaqədar başda Türkiyə prezidenti Rəcəb Tayyip Ərdoğan olmaqla, ölkə rəsmiləri, klub prezidentləri, idman ictimaiyyətinin nümayəndələri başsağlığı veriblər.
Qeyd edək ki, İlhan Cavcav 1978-ci ildən "Gənclərbirliyi"nin prezidenti idi.
