Azərbaycan Premyer Liqasının ötən turunda maraqlı göstərici qeydə alınıb.
Sportnet.az-ın məlumatına görə, keçirilən 4 oyunda 9 qol müəllifindən yalnız 1-i legionerdir. O da çempionatın ilk yarısında iştirak etməyən, qış fasiləsində "Qəbələ"yə dönən Daniel Subotiçdir. İsveçrəli hücumçu "Neftçi" ilə ev oyununda meydana çıxandan 20 dəqiqə sonra - 77-ci dəqiqədə başla qələbə topunun müəllifi olub - 1:0.
XVI turda digər fərqlənənlər azərbaycanlı oyunçular - Maksim Medvedev, Coşqun Diniyev (hər ikisi "Qarabağ"), Rəşad Abdullayev (AZAL), Nurlan Novruzov ("Zirə"), Mirabdulla Abbasov, Nicat Muxtarov (hər ikisi "Sumqayıt"), İlkin Qırtımov, Rauf Əliyevdir (hər ikisi "İnter").
Bu çempionatda 1 dəfə - V turda belə olay baş verib. Maraqlıdır ki, onda da "Qəbələ"nin legioneri - xorvatiyalı yarımmüdafiəçi Filip Ozobiç fərqlənən yeganə legioner olub. Ancaq sizə təqdim etdiyim siyahıya nəzər salsaq, 16 turun daha çoxunda - 8-də yerli futbolçuların qol üstünlüyü diqqət çəkir. Qalan 7 turda əcnəbi oyunçular hegemon, 1 turda isə say bərabər olub.
Cari çempionatda turlar üzrə qollar
I tur - 5 yerli, 2 legioner
II tur - 1 yerli, 2 legioner
III tur - 4 yerli, 9 legioner
IV tur - 7 yerli, 12 legioner
V tur - 9 yerli, 1 legioner
VI tur - 6 yerli, 5 legioner
VII tur - 3 yerli, 5 legioner
VIII tur - 3 yerli, 5 legioner
IX tur - 4 yerli, 4 legioner
X tur - 7 yerli, 5 legioner
XI tur - 2 yerli, 3 legioner
XII tur - 5 yerli, 2 legioner
XIII tur - 3 yerli, 6 legioner
XIV tur - 3 yerli, 2 legioner
XV tur - 8 yerli, 4 legioner
XVI tur - 8 yerli, 1 legioner
Subotiçə gəlincə, o, "Qəbələ"yə ilk gəlişində - debütündə də qol vurmuşdu. Bu, 2013/2014 mövsümünün VI turunda - 2013-cü il sentyabrın 15-də AZAL-a 2:1 hesabı ilə qalib gəldikləri səfər matçının 29-cu dəqiqəsində olub. O, bunadək sonuncu qolunu isə XXXIV turda "Bakı"nı 3:1 hesabı ilə məğlub etdikləri matçda vurmuşdu. Ucaboylu hücumçu bu dəfə Qəbələdə 57-ci dəqiqədə meydana daxil oldusa, onda həmin dəqiqədə rəqib qapısına yol tapmışdı.
Maraqlıdır ki, Daniel ilk dəfədir "Neftçi"nin qapısına yol tapır. Legioner bunadək "ağ-qaralar"la 4 dəfə görüşsə də, onu məyus edə bilməmişdi. Subotiçin həmin çempionatda 12 dəfə fərqləndiyini nəzərə alsaq, qol sayı nəhsə - 13-ə çatıb. O, 1 dəfə isə Azərbaycan Kubokunda "Qarabağ"la 1/4 final matçında qol müəllifi olub.
Mehman SÜLEYMANOV
