"Bizi "İnter"ə qarşı çətin matç gözləyir. Cavab qarşılaşmaları hər zaman ağır olur. "İnter” bu oyunda bütün gücünü qoyacaq. Biz də sona qədər oynayacağıq”.
Bunu Sportnet.az-a açıqlamasında "Qəbələ”nin müdafiəçisi Məhəmməd Mirzəbəyov Azərbaycan Kubokunun yarımfinal mərhələsinin cavab oyunu barədə danışarkən deyib. Onun sözlərinə görə bugünkü matç ilk görüşdən də çətin olacaq: "Bakıdakı matçda 3:1 qalib gəlməyimizə baxmayaraq bizi çətin matç gözləyir. Gərək güclü oynayaq və finala adlayaq”.
Mirzəbəyov digər cütlükdən "Neftçi" və ya "Qarabağ"ın finala adlamasının özləri üçün önəm kəsb etmədiyini söyləyib: "Biz öz oyunumuzu düşünürük. Digər cütlükdən hansı komandanın finala çıxması o qədər də önəmli deyil. Əsas odur ki, biz öz işimizin öhdəsindən gələk və finala adlayaq".
Qeyd edək ki, bu gün keçiriləcək "Qəbələ" - "İnter" matçı saat 16:30-da başlanacaq.
