Futbol üzrə Azərbaycan Premyer Liqasında XXV turun daha bir oyunu keçirilib.
Sportnet.az-ın məlumatına görə, Tofiq Bəhramov adına Respublika stadionunda lider "Qarabağ"la ən yaxın izləyicisi "Qəbələ" üz-üzə gəlib. Görüş qolsuz bərabərliklə yekunlaşıb. Bu heç-heçədən sonra "Qarabağ" xalını 53-ə, "Qəbələ" 49-a çatdırıb.
Qeyd edək ki, XXV tura aprelin 10-da keçiriləcək "Zirə" - "İnter" və AZAL "Sumqayıt" oyunları ilə yekun vurulacaq.
---------------------------------------------------------------------------------------
Futbol üzrə Azərbaycan Premyer Liqasında XXV tura start verilib.
Sportnet.az-ın məlumatına görə, açılış oyununda "Kəpəz" və "Neftçi" komandaları üz-üzə gəlib. Gəncə şəhər stadionunda keçirilmiş qarşılaşma meydan sahiblərinin qələbəsi ilə başa çatıb - 2:0. Hər iki qolu 1-cü və 41-ci dəqiqələrdə təyin olunmuş penaltilərdən sonra Tural Axundov vurub.
Bununla da xallarını 27-yə çatdıran "Kəpəz" "Neftçi"ni 1 xal və 1 pillə keçərək, 6-cı mövqeyə yüksəlib. Gəncə təmsilçisi Avropa Liqasına vəsiqə verən 4-cü yerdən 4, flaqmanı isə 5 xal ayırır.
---------------------------------------------------------------------
Bu gün keçiriləcək 2 oyunla futbol üzrə Azərbaycan Premyer Liqasında XXV tura start veriləcək. Sportnet.az-ın məlumatına görə, günün qarşılaşmaları klassik və müasir derbilərlə əlamətdar olacaq.
Əvvəlcə "Kəpəz" və "Neftçi" komandaları üz-üzə gələcək. Gəncə şəhər stadionunda baş tutacaq matç Avropa Liqasına vəsiqə verən 4-cü yer uğrunda mübarizə baxımından önəmli olacaq. Bu oyunda xal itirəcək tərəf qitəmiqyaslı turnirdən faktiki kənarda qalacaq. Hazırda 31 xalla 4-cü pillədə olan "Zirə"dən "Neftçi" 5, "Kəpəz" isə 7 xal geridə qalır.
Əzəli rəqiblər indiyədək çempionatda 46 dəfə üz-üzə gəliblər. Bunların 17-də "Kəpəz", 21-də "Neftçi" qələbə qazanıbsa, 8 görüş heç-heçə nəticələnib. Topların nisbətində də paytaxt komandası öndədir - 69:43. Son üç oyunda meydan sahibi olan tərəf qol buraxmayıb. Gəncə təmsilçisi isə son üç ev matçını qolsuz tərk etməyib.
Müasir derbidə isə "Qarabağ"la "Qəbələ" komandaları görüşəcəklər. Tofiq Bəhramov adına Respublika stadionunda baş tutacaq matçda çempionluğun taleyi böyük ölçüdə həll oluna bilər. 52 xala malik Ağdam təmsilçisinə özündən 4 xal geridə qalan rəqibinə uduzmaması da kifayət edə bilər. Sona 4 tur qalmış ardıcıl 4-cü çempionluğu təmin etməyə yaxın olan "Qarabağ" qələbə qazanmaqla buna faktiki yiyələnəcək.
Son 3 turda qələbə üzünə həsrət qalan "Qəbələ" isə bu dəfə meydanı 3 xalla tərk etməyi bacarmalıdır. "Qırmızı-qaralar" yalnız bu halda liderlə fərqi 1-ə endirərək, ən azı intriqanı davam etdirə bilərlər.
İki komanda indiyədək Premyer Liqada 35 dəfə üz-üzə gəlib. Bunlardan 16-da "Qarabağ", 9-da "Qəbələ" qalib gəlibsə, 10 görüşdə tərəflər hərəyə 1 xalla kifayətləniblər. Topların nisbəti də ağdamlıların xeyrinədir - 46:34. Digər tərəfdən, son 4 matçda meydan sahibi komanda 2 qol vuraraq, qalib gəlib. "Qarabağ” da son 3 ev oyununda qol sevinci yaşayıb və xal qazanıb.
Azərbaycan Premyer Liqası, XXV tur
9 aprel (bazar)
16:00. "Kəpəz” – "Neftçi” - 2:0
Qollar: Tural Axundov, 13; 41 (hər ikisi penalti ilə)
Hakimlər: Elvin Əsgərov, Rahil Ramazanov, Mübariz Haşımov, Ömər Paşayev
AFFA nümayəndəsi: Əsgər Əmirəliyev
Hakim-inspektor: Murad Məmmədov
Gəncə şəhər stadionu
İlk 3 dövrədəki oyunlar: 0:2, 2:0, 0:0
20:30. "Qarabağ” – "Qəbələ” - 0:0
Hakimlər: Fariz Yusifov, Yaşar Abbasov, Elman Musayev, Orxan Məmmədov
AFFA nümayəndəsi: Elbrus Abbasov
Hakim-inspektor: Əli Hüseynov
Tofiq Bəhramov adına Respublika stadionu (CBC Sport / canlı)
İlk 3 dövrədəki oyunlar: 0:2, 2:1, 0:2
Bombardir: Filip Ozobiç ("Qəbələ") - 11 qol.
