Futbol üzrə Çempionlar Liqasında 1/4 final mərhələsinin ilk görüşlərinə yekun vurulub.
Sportnet.az-ın məlumatına görə, ikinci oyun günündə 3 matç baş tutub. Əvvəlcə ötən gündən təxirə salınmış matçda Almaniyanın "Borussiya" (Dortmund) və Fransanın "Monako" komandaları üz-üzə gəlib. Görüş qonaqların qələbəsi ilə yekunlaşıb - 3:2. "Monako"nun qollarından 2-ni gənc forvard Kilian Mbappe vurub. Bu görüş avtoqol və dəqiq yerinə yetirilməyən penalti ilə də əlamətdar olub.
Almaniyanın digər təmsilçisi "Bavariya" da öz meydanında uduzub. Münhen klubu İspaniya "Real Madrid"i ilə görüşdə qələbəni əldən verib. İlk yarıda önə keçən Karlo Ançelottinin baş məşqçi olduğu komanda hissənin sonlarında penaltidən yararlana bilməyib. Fasilədən sonra isə Kriştianu Ronaldu "dubl" edib. Ronaldu ikinci qolu "Bavariya" azlıqda olduğu vaxt vurub.
Almaniyalılardan fərqli olaraq, İspaniyanın daha bir təmsilçisi "Atletiko" da qələbə qazanıb. Dieqo Simeonenin baş məşqçi olduğu komanda evdə İngiltərə çempionu "Lester"ə minimal hesabla qalib gəlib. Bununla da madridlilər İspaniyanın "Barselona" klubunun ilk oyun günündə İtaliya "Yuventus"u ilə görüşdə üzləşdiyi uğursuzluğu (0:3) qismən unutdura biliblər.
Qeyd edək ki, cavab görüşləri 18-19 apreldə olacaq.
Çempionlar Liqası, 1/4 final
İlk oyunlar
12 aprel
20:45 "Borussiya” (Dortmund, Almaniya) – "Monako” (Fransa) - 2:3
Qollar: Usman Dembele, 57. Sindzi Kaqava, 84 - Kilian Mbappe, 20; 79. Sven Bender, 35-öz qapısına
Vurulmayan penalti: Fabinyo, 17 ("Monako")
Baş hakim: Daniele Orsato (İtaliya)
22:45 "Bavariya” (Almaniya) – "Real Madrid” (İspaniya) - 1:2
Qol: Arturo Vidal, 25 - Kriştianu Ronaldu, 47; 77
Qırmızı vərəqə: Xavi Martines, 61 ("Bavariya")
Vurulmayan penalti: Arturo Vidal, 45+2 ("Bavariya")
Baş hakim: Nikola Ritsoli (İtaliya)
22:45 "Atletiko” (İspaniya) – "Lester” (İngiltərə) - 1:0
Qol: Antuan Qrizmann, 27-penalti ilə
Baş hakim: Yunas Eriksson (İsveç)
