"Qarabağ" klubu Çempionlar Liqasının "pley-off" mərhələsinin püşkatma mərasimində daha yüksək reytinqli komandalardan ibarət Səpələnmişlər səbətində yer ala bilməyəcək. Sportnet.az-ın məlumatına görə, bu, III təsnifat mərhələsinin bu gün keçirilmiş cavab görüşləri nəticəsində müəyyənləşib.
Səbəb növbəti mərhələyə vəsiqəni təmin etmiş klublardan ən azı 5-nin Azərbaycan təmsilçisindən yüksək reytinqə malik olmasıdır. Səpələnmişlər səbətinə Yunanıstan "Olimpiakos"u (64,580), Şotlandiya "Seltik"i (42,785), Danimarka "Kopenhagen"i (37,800), Kipr APOEL-i (26,210) və Sloveniya "Maribor"u (21,125) düşüb.
18,050 reytinq xalına malik "Qarabağ" isə Qazaxıstan"Astana”sı (16,800), Xorvatiya "Riyeka”sı (15,550), İsrailin Beer-Şeva şəhərini təmsil edən "Hapoel” (10,875) və Çexiya "Slaviya"sı (8,135) ilə birgə Səpələnməmişlər səbətində yer alacaq. Bu isə o deməkdir ki, Ağdam klubu Səpələnmişlərdən birinə rəqib olacaq.
Qeyri-çempionlar Yolunda isə Türkiyə təmsilçisi "Başakşehir" də Səpələnməmişlər səbətində yer alacaq:
Səpələnmişlər: İspaniya "Sevilya"sı (112,999), İtaliya "Napoli"si (88,666), İngiltərə "Liverpul"u (56,192), Rusiya MOİK-i (39,606), Portuqaliya "Sportinq"i (36.866)
Səpələnməmişlər: Rumıniya "Styaua"sı (35,370), İsveçrə "Yanq Boyz"u (28,915), Almaniya "Hoffenhaym"ı (15,899), Fransa "Nitsa"sı (16,833) və Türkiyə "Başakşehir"i (10,340).
Qeyd edək ki, püşkatma mərasimi avqustun 4-də Bakı vaxtı ilə saat 14:00-da, "pley-off" mərhələsinin qarşılaşmaları isə 15-16 avqust və 22-23 avqustda keçiriləcək.
