"Roma" "Qarabağ"la keçirəcəyi qarşılaşmaya özünü "Real Madrid"lə görüşəcəkmiş kimi hazırlamalıdır. Əks halda, BATE aqibəti yaşana və bu da utanc ola bilər".
Sportnet.az-ın məlumatına görə, bunu məşhur italiyalı məşqçi Arriqo Sakki Çempionlar Liqasının II tur matçından əvvəl "La Gazzetta dello Sport"dakı məqaləsində yazıb. Təcrübəli mütəxəssisin fikrincə, "Qarabağ" "Roma" kimi komanda ilə qarşılaşacağı üçün narahatlıq keçirməməli, əksinə, İtaliya təmsilçisi matça daha ciddi yanaşmalıdır.
Qeyd edək ki, sentyabrın 27-də Bakı Olimpiya Stadionunda keçiriləcək matç saat 20:00-da başlanacaq. "Roma" Çempionlar Liqasında 2015-2016 mövsümündə Belarus BATE-sinə səfərdə 2:3 hesabı ilə uduzub, evdə isə qolsuz bərabərliklə kifayətlənib. Arriqo Sakki isə əvvəllər İtaliya milli komandasının, eləcə də bir çox tanınmış yerli klubun və İspaniya "Atletiko"sunun baş məşqçisi olub.
