Bu gün futbol üzrə Azərbaycan milli komandası növbəti oyununu keçirib.
Sportnet.az xəbər verir ki, Qurban Qurbanovun rəhbərlik etdiyi kollektiv yoldaşlıq matçı çərçivəsində Belarus yığmasını qəbul edib. Bakı Olimpiya Stadionunda baş tutan oyun qonaqların 1:0 hesablı qələbəsi ilə yekunlaşıb. Yeganə topu 41-ci dəqiqədə rəqib futbolçu İqor Staseviçin zərbəsindən sonra Maksim Medvedev öz qapısına göndərib.
Bu, millinin 46 yaşlı mütəxəssisin rəhbərliyi altında ilk ev qarşılaşması olub. Yanvarın 30-da Moldova ilə Türkiyənin Antalya bölgəsində keçirilmiş görüş qolsuz yekunlaşıb - 0:0. Digər tərəfdən, Azərbaycan millisi tarixində ilk dəfə Belarusa uduzub. Əvvəlki yoldaşlıq görüşlərində 1 heç-heçə, 1 qələbə qeydə alınmışdı.
Qeyd edək ki, Azərbaycan millisi növbəti görüşünü martın 27-də Antalyada Makedoniyaya qarşı keçirəcək.
--------------------------------------------------------------
Bu gün futbol üzrə Azərbaycan milli komandası növbəti oyununu keçirəcək.
Sportnet.az xəbər verir ki, Qurban Qurbanovun rəhbərlik etdiyi kollektiv yoldaşlıq matçı çərçivəsində Belarus yığmasını qəbul edəcək. Bu, millinin 46 yaşlı mütəxəssisin rəhbərliyi altında ilk ev qarşılaşması olacaq.
Yığmanın baş məşqçisi qismində Türkiyənin Antalya bölgəsində Moldova kollektivi ilə qolsuz heç-heçə başa çatan oyunda debüt edən Q.Qurbanov yanvarın 30-dakı görüşə dəvət etdiyi 24 futbolçudan 11-ni Belarus və Makedoniya ilə duellər üçün çağırmayıb. Bunlar Əfran İsmayılov, Rahid Əmirquliyev, Mahir Mədətov, Ramil Şeydayev, Abbas Hüseynov, Şahrudin Məhəmmədəliyev, Cavid Hüseynov, Təmkin Xəlilzadə, Məhəmməd Mirzəbəyov, Anton Krivotsyuk və Bəhlul Mustafazadədir.
Əvəzində Səlahət Ağayev, Namiq Ələsgərov, Asif Məmmədov, Ürfan Abbasov, Tural Axundov, Rəşad Eyubov, Amil Yunanov, Rahil Məmmədov, Şəhriyar Rəhimov, Araz Abdullayev və Dmitri Nazarova etimad göstərilib.
Bakı Olimpiya Stadionunda keçiriləcək matç Azərbaycan və Belarus yığmalarının 3-cü görüşü kimi tarixə düşəcək. İlk qarşılaşma 1996-cı il mayın 27-də Molodeçnoda reallaşıb və qalib müəyyənləşməyib – 2:2. Həmin dueldə yığmanın ilk qolunu məhz Q.Qurbanov vurub.
2001-ci il fevralın 26-da isə bu kollektivlər Bolqarıstanda üz-üzə gəliblər. Azərbaycan millisi Zaur Tağızadənin qolu ilə minimal hesablı qələbə qazanıb.
Yoldaşlıq oyunu
23 mart
20:00. Azərbaycan – Belarus - 0:1
Qol: Maksim Medvedev, 41 (öz qapısına)
Hakimlər: Andris Treymanis, Haralds Gudermanis və Aleksey Spasyonnikov (hamısı Latviya)
Bakı Olimpiya Stadionu.
