İspaniyanın "Barselona" klubu futbolçusu Samuel Umtiti ilə müqavilənin uzadılması barədə razılaşa bilmir.
Sportnet.az-ın "Sport.es"ə istinadən verdiyi məlumata görə, tərəflər maliyyə məsələləri ilə bağlı fikir ayrılığındadır. Buna görə də razılıq əldə olunmur.
24 yaşlı müdafiəçinin hazırki müqaviləsi 2021-ci ilə qədər nəzərdə tutulub. Amma Kataloniya təmsilçisini narahat edən məqam var. Umtitinin müqaviləsinə əsasən, hər hansı bir klub 60 milyon avro ödəcəyi təqdirdə fransalını transfer edə bilər.
Müdafiəçi ilə yaxından maraqlanan İngiltərənin "Mançester Yunayted" klubu isə bundan istifadə etməklə onu yayda heyətinə cəlb etmək niyyətindədir. Həmçinin, futbolçu "Barselona"da illik 4 milyon avro qazanırsa, İngiltərə nəgəngi ona illik 9 milyon avro ödəməyə hazırdır.
