"Sumqayıt”ın futbolçusu Rəşad Eyubov Topaz Premyer Liqasının XXII turunda səfərdə "Neftçi” ilə 2:2 hesablı heç-heçədən sonra jurnalistlərin suallarını cavablandırıb.
Sportnet.az həmin müsahibəni təqdim edir:
- Oyunun gedişində gözlənilmədən meydanı tərk etməyiniz nə ilə bağlı idi?
- Texniki problem idi. Tualetə getmək lazım idi. Ona görə çıxdım. Lakin baş məşqi dəyişiklik etməyə qərar verdi.
- Çıxmasaydınız, əvəzetmə olmazdı?
- Təxminən 3 dəqiqə olmadım. Bilmirəm. Baş məşqçi belə istədi. Bu, onun qərarıdır.
- Oyun barədə nə deyə bilərsiniz?
- İki fərqli hissə oldu. Yaxşı başladıq, qol vəziyyətləri yaratdıq. İkinci hissəyə yaxşı başlamadıq. Təşəbbüsü "Neftçi”yə verdik. Öz səhvlərimizdən qol buraqdıq. Bunları analiz edəcəyik. Lakin xarakterin hesabına məğlubiyyətdən qaçmağı və vacib bir xal qazanmağı bacardıq.
- Bu nəticə ilə razısınız?
- Bir tərəfdən razıyam, digər tərəfdən yox. Bir xal da bir xaldır.
- Gözəl qol vurdunuz. Bunu karyeranızın ən yaxşı qolu hesab etmək olar?
- Qolları gözəl və ya gözəl olmayan kateqoriyalara bölmürəm. Onları vacib və vacib olmayanlar formasında ayırıram. Bu qol bizim üçün vacib xal gətiribsə, mənim üçün də önəmlidir.
- Qarşıda Azərbaycan Kubokunun yarımfinalında "Keşlə” ilə oyunlar var...
- Bəli, kuboka hazırlaşırıq. Şansları 50/50-yə dəyərləndirirəm. Görünür ki, onların çempionatda hədəfləri yoxdur. Bütün fikirləri kuboka yönəlib.
- Milli komandaya dəvət alandan sonra daha önəmli çıxış edirsiniz...
- Əlbəttə, milliyə çağırılmaq çox xoşdur. Bu, hər bir futbolçu üçün fəxr və əlavə məsuliyyətdir. Yığmada qalmaq üçün daha yaxşı oynamalısan.
- "Neftçi”dən təklif olsa, müsbət cavab verərsiniz?
- Hələlik bütün fikirlərim "Sumqayıt”la bağlıdır. Mövsüm başa çatanda sonra bu cür məsələlərə baxacağıq.
- "Sumqayıt”ın bir neçə futbolçusunun yay fasiləsində "Neftçi”yə keçəcəyi deyilir...
- Mənimlə heç kim əlaqə saxlamayıb. Olsa belə, heç kimlə danışıq aparmaram. Bu, ilk növbədə "Sumqayıt”a qarşı düzgün olmaz. "Neftçi” avrokuboka vəsiqə qazanmaq baxımından əsas rəqibimizdir.
