"Qəbələ" klubu Dion Malone ilə yollarını ayıra bilər.
Sportnet.az-ın Hollandiya mətbuatına istinadən məlumatına görə, 29 yaşlı müdafiəçi yerli "ADO Den Haaq"ın maraq dairəsindədir. Surinam əsilli oyunçunu Haaqa təmsilçisi yayda sağ cinaha transfer etmək üçün nəzərdə tutub. Bu mövqeyə onunla yanaşı, "Tvente"dən Hidde Ter Avest və hazırda "Qroningen"də icarə əsasında çıxış edən "Ayaks"ın futbolçusu Deyovaysio Zeefuyk namizəddir.
"Qəbələ"dən Sportnet.az-a verilən məlumata görə, Malone ilə ötən yay bağlanılmış 2 illik müqavilə qüvvədədir. Lakin futbolçu ona təkliflərin olduğunu və "qırmızı-qaralar"dan ayrılmaq istədiyini bildirib. Məsələyə yaxın vaxtlarda aydınlıq gələcək.
Qeyd edək ki, Dion Malone bu mövsüm "Qəbələ"nin əsas heyətinə düşməkdə çətinlik çəkib. O, ötən yay məhz "ADO Den Haaq"dan transfer edilib.
