Futbol üzrə Avropa Liqasında 2017-2018 mövsümünün qalibi müəyyənləşib.
Sportnet.az-ın məlumatına görə, bu, İspaniyanın "Atletiko" klubudur. Madrid təmsilçisi Fransanın Lion şəhərindəki eyniadlı stadionda keçirilmiş final matçında "Marsel" üzərində böyük hesablı qələbə qazanıb - 3:0. İlk iki qolu "Atletiko"nun fransalı hücumçusu Antuan Qrizmann vurub. O, 21-ci və 49-cu dəqiqələrdə fərqlənib. Oyunda son nöqtəni isə 89-cu dəqiqədə Qabi qoyub.
32-ci dəqiqədə "Marsel"in kapitanı Dimitri Payetin xidmətindən məhrum olub. Baldırından xəsarət alan Payet Maksim Lopeslə əvəzlənib. O, meydanı tərk edərkən, göz yaşlarına hakim ola bilməyib. "Atletiko"nun baş məşqçisi Dieqo Simeone isə cəzalı olduğu üçün görüşü tribunadan izləyib. Lakin bu məqam argentinalı mütəxəssisin komandasına tarixində üçüncü dəfə Avropa Liqasının qalibi olmaqda maneçilik törətməyib. Daha əvvəl Madrid təmsilçisi 2010 və 2012-ci illərdə Avroliqanın baş mükafatını əldə edib. "Marsel" üzərində qələbə sayəsində "Atletiko" 2018-2019 mövsümündə də Çempionlar Liqasının qrup mərhələsində iştirak hüququna yiyələnib.
Bu mövsüm də mübarizəyə eyni mərhələdən başlamış Simeonenin komandası Azərbaycan təmsilçisi qrupda "Qarabağ"la birgə yer almışdı. Komandalar arasındakı hər iki görüş heç-heçə ilə başa çatmışdı - 0:0, 1:1.
Qeyd edək ki, "Atletiko" həm də Avroliqanı qazanma sayında "Sevilya"nın rekordunu təkrarlayıb. "Sevilya" 2014 - 2016-cı illərdə bu turnirin qalibi olub.
------------------------------------------
Bu gün Fransanın Lion şəhərində futbol üzrə Avropa Liqasının final matçı keçiriləcək.
Sportnet.az-ın məlumatına görə, qitənin ikinci ən nüfuzlu klub turnirinin qalibi adı uğrunda Fransanın "Marsel” və İspaniyanın "Atletiko” komandaları üz-üzə gələcəklər.
Madridlilər 2010 və 2012-ci illərdə turnirin qalibi olduqları halda, marsellilər 1999 və 2004-cü illərdə həlledici görüşlərdə uduzublar. Ümumiyyətlə, hər iki kollektiv yetərincə avrokubok təcrübəsinə malikdir.
"Marsel” indiyədək 5 dəfə avrokuboklarda finalçı olub və bunlardan 2-də qalib gəlib. Fransa təmsilçisi 1993-cü ildə Çempionlar Liqasında (ÇL) İtaliya "Milan”ını (1:0), 2005-ci ildə isə İntertoto Kubokunda İspaniyanın "Deportivo” komandasını (0:2, 5:1) məğlub edib.
"Atletiko” tarixi ərzində ikinci dəfə Lionda final oyununa çıxacaq. 1986-cı ildə Kuboklar Kubokunun həlledici qarşılaşmasında Kiyev "Dinamo”suna uduzan (0:3) ispaniyalılar indiyə qədər 12 dəfə avrokuboklarda finalda iştirak ediblər və bunlardan 6-da qalib gəliblər. Madrid təmsilçisi 1962-ci ildə Kuboklar Kubokunda İtaliyanın "Fiorentina” komandasını (3:0), 2007-ci ildə isə İntertoto Kubokunda Rumıniya "Qloriya”sını (2:2, səfər qolu sayəsində) məğlub edib.
2010 və 2012-ci illərdə Avropa Liqasının qalibi kimi UEFA Superkuboku uğrundan görüşə çıxan "Atletiko” hər iki görüşdə güclü tərəf olub. İspaniyalılar müvafiq olaraq, İtaliya "İnter”i (2:0) ilə İngiltərə təmsilçisi "Çelsi”ni məğlub ediblər (4:1).
"Marsel” və "Atletiko” fərqli yollarla finaladək irəliləyiblər. Marsellilər başlanğıcıdan bu turnirdə mübarizə apardıqları halda, "Atletiko” ÇL-in qrup mərhələsində "Qarabağ”la görüşlərdə xal itirdiyi üçün (0:0, 1:1) 3-cü yerin sahibi kimi mübarizəni Avropa Liqasında davam etdirməli olub.
"Atletiko” La Liqada mövsümün başa çatmasına bir tur qalmış 78 xalla 2-ci pillədə qərarlaşıb və ÇL-ə vəsiqəni təmin edib. "Marsel” isə 37 turdan sonra 74 xalla 4-cü pillədə gedir və ÇL-ə vəsiqə verən 3-cü sıradakı "Lion”dan 1 xal geri qalır.
Final
16 may
22:45. "Marsel” (Fransa) – "Atletiko” (İspaniya) - 0:3
Qollar: Antuan Qrizmann, 21; 49. Qabi, 89
Baş hakimi: Byörn Keypers (Hollandiya)
Lion. Stad-de-Lion.
