İspaniya milli komandasının baş məşqçisi Xulen Lopetegi dünya çempionatının startına bir gün qalmış tutduğu postdan qovulub.
Sportnet.az-ın məlumatına görə, bu barədə İspaniya Kral Futbol Federasiyasının prezidenti Luis Rubiales açıqlama verib. Rubiales belə bir qərarı verməyə məcbur olduqlarını bildirib: "Lopetegiyə uğurlar arzulayırıq. İspaniya yığması nəyə nail olsa, onun işinin əməyi olacaq".
2010-cu ilin dünya çempionu DÇ-2018-də ilk görüşünü iyunun 15-də Portuqaliyaya qarşı keçirəcək. Lopetegi yığmaya 2016-cı ildən rəhbərlik edirdi.
Qeyd edək ki, iyunun 12-də "Real Madrid" klubu yeni baş məşqçisinin Xulen Lopetegi olacağını açıqlayıb. 52 yaşlı mütəxəssislə 3 illik müqavilə imzalanacaq.
