2026-cı il futbol üzrə dünya çempionatına ev sahibliyi edəcək ölkələr müəyyənləşib.
Sportnet.az-ın məlumatına görə, Kanada - Meksika - ABŞ triosu mundialı birgə təşkil edəcək. Bu qərar FİFA-nın Rusiyanın paytaxtı Moskvada keçirilən 68-ci konqresində açıq elektron səsvermənin yekununda açıqlanıb. Yeganə rəqib olan Mərakeşə 65, trioya isə 134 səs verilib. 1 səs isə bitərəf olub.
DÇ-2026-da ilk dəfə 32 deyil, 48 ölkə mübarizə aparacaq. Onlar 16 qrupda çıxış edəcəklər. Hər qrupdan 2 komanda 1/16 finala yüksələcək.
Bundan başqa, dünya çempionatı ilk dəfə 3 ölkədə təşkil olunacaq. Əvvəllər yalnız bir dəfə 2 ölkə - Yaponiya və Cənubi Koreya DÇ-2002-yə ev sahibliyi edib.
Konqresdə AFFA prezidenti Rövnəq Abdullayev, vitse-prezident Elşad Nəsirov və baş katib Elxan Məmmədov iştirak ediblər. DÇ-2026-da ilk dəfə 48 ölkə 16 qrupda mübarizə aparacaq.
