AFFA prezidenti Rövnəq Abdullayevlə Ukrayna Futbol Federasiyasının rəhbəri Andrey Pavelko arasında görüş keçirilib.
Sportnet.az milli assosiasiyanın rəsmi saytına istinadən xəbər verir ki, UEFA Avropa Liqasının qrup mərhələsində "Qarabağ”ın Ukrayna təmsilçisi "Vorskla”ya 0:1 hesabı ilə uduzduğu oyununu izləmək üçün Bakıya səfər edən A.Pavelko ilə R.Abdullayev arasında söhbət zamanı AFFA ilə UFF arasında qarşılıqlı əməkdaşlığın yüksək səviyyədə olduğu bildirilib, gələcəkdə də hər iki ölkənin futbol qurumlarının müxtəlif istiqamətlər üzrə tərəfdaşlıq etməsinin perspektivləri müzakirə olunub.
Avropa Liqası turnirinin 2019-cu ildə Bakı Olimpiya Stadionunda keçiriləcək final oyununun təbliğat kampaniyası çərçivəsində Azərbaycan və Ukraynanın futbol veteranları arasında gələn il yoldaşlıq oyununun təşkil olunması barədə fikir mübadiləsi aparılıb, ilkin razılığa gəlinib.
A.Pavelko UFF-in nümayəndə heyəti adından görüşün təşkili və səmərəli müzakirələrə görə minnətdarlığını bildirib.
