Mövsümün ikinci yarısının hazırlıqlarını Türkiyənin Antalya bölgəsində davam etdirən “Qəbələ” komandası bu gün növbəti yoxlama oyununu keçirib.
Sportnet.az-ın məlumatına görə, “qırmızı-qaralar” ikinci görüşündə Rusiyanın “Yenisey” klubu ilə qarşılaşıb. Belek qəsəbəsindəki “Cornelia Diamond” otelinin meydançasında təşkil olunmuş qarşılaşma 2:2 hesablı heç-heçə ilə yekunlaşıb.
Matçdan öncə 20 yanvar şəhidlərinin xatirəsi bir dəqiqəlik sükutla yad olunub. "Qəbələ"nin futbolçuları meydana qara sarğı ilə çıxıblar.
Birinci hissədə qapılara qol vurulmayıb. Fasilədə və ikinci hissənin gedişində hər iki komandanın heyətində oyunçu dəyişiklikləri olub. “Qəbələ”də Asif Məmmədov, Sabien Lilay, Qismət Alıyev, Lalevele Atakora, Rövlan Muradov komanda yoldaşlarını əvəzləyib. Hesab 53-cü dəqiqədə açılıb. Rauf Əliyev Rusiya təmsilçisinin qapısına qol vurub. Üç dəqiqə sonra şimallılar Aleksey Qritsayenkonun qolu ilə hesabı bərabərləşdirib. 71-ci dəqiqədə “Yenisey”in qapısına təyin olunan penaltini Sabien Lilay dəqiq yerinə yetirib. Hakimin final fitinə 4 dəqiqə qalmış Rusiya Premyer Liqası təmsilçisi Mixail Komkovun qolu sayəsində hesabda tarazlıq yaradıb – 2:2. Beləliklə, yoxlama oyunu məhsuldar heç-heçə ilə başa çatıb.
Qeyd edək ki, Rusiya Premyer Liqasında çıxış edən “Yenisey”in əsası 1937-ci ildə qoyulub. Krasnoyarsk şəhərini təmsil edən klub ötən mövsüm aşağı liqada 3-cü yeri tutaraq Premyer Liqaya vəsiqə qazanıb. Cari mövsümün 17 oyununda 10 xal toplayan “Yenisey” qış fasiləsinə 16-cı pillədə yollanıb.
Bu matç “Qəbələ”nin Antalyada ikinci sınağı olub. "Qırmızı-qaralar" ilk oyunda Almaniyanın “Meppen”inə 1:2 hesabı ilə uduzub.
Yoxlama oyunu
20 yanvar
18:00. “Qəbələ” – “Yenisey” (Rusiya) - 2:2
Qollar: Rauf Əliyev, 53. Sabien Lilay, 71-pen. - Aleksey Qritsayenko, 56. Mixail Komkov, 90
“Cornelia Diamond” otelinin meydançası
"Qəbələ"nin start heyəti: 22. Dmitri Bezotosnı, 3. Vojislav Stankoviç, 27. Bəhlul Mustafazadə, 23. Amin Seydiyev, 34. Ürfan Abbasov, 4. Elvin Camalov, 14. Cavid Hüseynov, 17. Ceyms Adeniyi, 28. Stiven Monroz, 10. Rauf Əliyev, 99.Davit Volkovi.
