Türkiyənin Antalya bölgəsində təlim-məşq toplanışında olan "Səbail" komandası bu gün növbəti yoxlama matçına çıxıb.
Sportnet.az-ın məlumatına görə, Aftandil Hacıyevin baş məşqçi olduğu kollektiv Ukrayna "Desna"sı ilə qarşılaşıb. Öncədən görüşün "Miracle" otelinin futbol meydanında keçirilməsi nəzərdə tutulurdu. Lakin yağışlı hava şəraitinin törədə biləcəyi fəsadları nəzərə alan təşkilatçılar matçın Side qəsəbəsində keçirilməsinə qərar veriblər. "Arslan Zeki Demirci" İdman Kompleksində baş tutmuş qarşılaşma "Səbail"in 2:1 hesablı qələbəsi ilə yekunlaşıb. Qalib komandanın qollarını 39-cu dəqiqədə Orxan Qurbanlı, 70-ci dəqiqədə isə Kevin Kubemba vurub.
Çerniqov şəhərini təmsil edən "Desna" Ukrayna Premyer Liqasında 18 turdan sonra 24 xalla 6-cı pillədə qərarlaşıb.
Yoxlama oyunu
18:30. "Səbail" - "Desna" (Ukrayna) - 2:1
Qollar: Orxan Qurbanlı, 39. Kevin Kubemba, 70 - Aleksandr Volkov
"Arslan Zeki Demirci" İdman Kompleksi
"Səbail"in start heyəti: 25. Elxan Əhmədov, 13. Şəhriyar Rəhimov (k), 22. İqor Ristivoeviç, 4. Mauro Enrike, 26. Kamal Gurbanov, 70 Urfan Ismayılov, 5 Vüqar Bəybalayev, 8. Yevgeni Koçuk, 88. Orxan Qurbanlı, 7. Fəhmin Muradbəyli, 18. Aqşin Qurbanlı
Qeyd edək ki, daha əvvəl Macarıstan Aqvital"ını 3:2 hesabı ilə yenən "Səbail" İsveçrə "Sürix"i ilə heç-heçə edib - 1:1.
