“Zirə” klubu ilk dəfə beynəlxalq yoxlama oyunlarında ardıcıl 5 qələbə qazanıb.
Sportnet.az-ın məlumatına görə, qəsəbə təmsilçisi bu göstəriciyə Türkiyənin Antalya bölgəsindəki təlim-məşq toplanışındakı oyunlarından sonra imza atıb. Samir Abasovun baş məşqçi olduğu kollektiv Antalyada 14 günlük toplanış müddətində 3 yoxlama matçına çıxıb. Yanvarın 18-də Rumıniya “Voluntari”si ilə qarşılaşan komanda 1:0 hesabı ilə qalib gəlib. “Zirə”nin Antalyadakı ilk qoluna Pərdis Fərcad-Azad imza atıb. 4 gün sonra Macarıstan “Pakş"ı ilə görüşən “qartallar” yenə eyni hesabla qələbə qazanıb. Bu dəfə İlkin Qırtımov fərqlənib. Yanvarın 26-da keçirilmiş son sınaqda isə rəqib Rusiya “Tambov”u olub. "Zirə" yenə qol buraxmadan qalib gəlib - 2:0. Bu dəfə rəqib qapısına Bilal Həmdi və Aleksandr Dedov yol tapıb. Beləliklə, 3 oyuna 4 top vuran komanda qapısını toxunulmaz saxlayıb.
Yoxlama oyunlarındakı belə nəticə klubun tarixində də ən yaxşı göstəricidir. Premyer Liqada oynamaq hüququ qazandığı 2015-ci ilin yayından başlayaraq ildə 2 dəfə Türkiyəyə yollanan "Zirə" belə nəticələrə əvvəllər heç vaxt imza atmayıb. Bunadək komanda ən yaxşı halda 2 qələbə əldə edib. Antalyada keçirdiyi 3 oyunda qapısında qol görməyən “Zirə” ilk dəfə qonşu ölkədən qol buraxmadan dönür. İndiyədək ən yaxşı halda 1 dəfə rəqib qolu qeydə alınıb.
Bununla da “qartallar” 2018-ci ilin yayında başlayan beynəlxalq yoxlama oyunlarındakı uğurlu seriyalarını davam etdirib. 2018-ci ilin yayındakı toplanışda da məğlubiyyətlə üzləşməyən komanda 7 matçdır yenilmir. Son 6 görüşdə qapısından qol buraxmayan "Zirə" ardıcıl 5-ci quru hesablı qələbəsini qazanıb. Ötən toplanışın son iki görüşündə “Osmanlıspor” (Türkiyə) 1:0, “Traktorsazi”nin U-23 (İran) komandası 3:0 hesabı ilə məğlub edilib. Bu oyunlardan əvvəl isə “Girəsunspor” (Türkiyə) komandası ilə duel qolsuz bitib. Qətər “Əl-Xaritiya”sına da uduzmayan “Zirə” son qolunu həmin qarşılaşmada buraxıb – 1:1.
Qeyd edək ki, “Tambov” üzərində qələbə beynəlxalq yoxlama oyunlarında 10-cu olub. 21 matçda 4 heç-heçə və 7 məğlubiyyəti də olan komanda 27 qol vurub 18-ni buraxıb.
