Futbol üzrə Çempionlar Liqasında 1/4 final mərhələsinə daha iki vəsiqənin sahibi müəyyənləşib.
Sportnet.az-ın məlumatına görə, 1/8 final mərhələsini İngiltərənin "Mançester Yunayted" və Portuqaliyanın "Portu" komandaları adlamağı bacarıb. Ule Qunnar Sulşerin baş məşqçi olduğu kollektiv 1/8 final mərhələsində Fransa PSJ-sini iki oyunun cəmində mübarizədən kənarlaşdırıb. Parisdəki "Park de Prens" stadionunda keçirilmiş cavab qarşılaşmasında "qırmızı şeytanlar" qalib gəlib - 3:1. İlk matçda PSJ 2:0 hesabı ilə qalib gəlməsinə baxmayaraq, "Mançester Yunayted" səfər qolu sayəsində adını növbəti mərhələyə başlayıb.
Gecənin "Portu” (Portuqaliya) – “Roma” (İtaliya) matçının əsas vaxtıda isə meydan sahibləri qalib gəlib - 2:1. Lakin ilk görüşdə "Roma" eyni hesablı qələbə qazandığı üçün görüş əlavə vaxta uzanıb. Bu bölümdə isə "Portu" türkiyəli baş hakim Cüneyt Çakırın VAR sisteminə müraciətindən sonra təyin etdiyi penaltidən faydalanmağı bacarıb.
-----------------
Bu gün UEFA Çempionlar Liqasında 1/8 final mərhələsinin daha iki oyunu keçiriləcək.
Sportnet.az xəbər verir ki, Fransada PSJ İngiltərə “Mançester Yunayted”ini, Portuqaliyada isə “Portu” İtaliya “Roma”sını qəbul edəcək. İlk görüşdə parislilər İngiltərədə “qırmızı şeytanlar”ı Presnel Kimpembe və Kilian Mbappenin qolları ilə məğlub edib – 2:0. Üstəlik, hazırda “Mançester Yunayted”in heyətlə bağlı ciddi problemləri var. Pol Poqba cəzalı, Xuan Mata, Ander Errera, Antonio Valensiya, Cessi Linqard və Nemanya Matiç zədəlidir. Fil Cons, Aleksis Sançes və Antoni Marsialın oynayıb-oynamayacağı dəqiq bilinmir. PSJ-də isə Neymar zədəli, Stenli Nsoki və Edinson Kavaninin durumu isə sual altındadır.
“Mançester Yunayted”dən fərqli olaraq, “Roma” evdə “Portu”nu 2:1 hesabı ilə üstələyib. “Canavarlar”ın heyətində Nikolo Zanyolo "dubl" etdiyi halda, rəqib düşərgədə Adrian Lopez fərqlənib.
İtaliya komandasında Cengiz Ünder zədəlidir. Kostas Manolas və Zanyolonun meydana çıxıb-çıxmayacağı oyun saatında bəlli olacaq. “Portu”nun heyətində isə itki yoxdur.
Çempionlar Liqası
1/8 final, cavab oyunları
24:00. PSJ (Fransa) – “Mançester Yunayted” (İngiltərə) - 1:3
Qollar: Joan Bernat, 12 - Romelu Lukaku, 2;30. Markus Reşford, 90+4 (pen.)
Baş hakim: Damir Skomina (Sloveniya)
Paris. “Park-de-Prens”
İlk oyun – 2:0
24:00. “Portu” (Portuqaliya) – “Roma” (İtaliya) - 3:1 (əlavə vaxt - 1:0)
Qollar: Tyaqu Suares, 26. Mussa Mareqa, 52. Aleks Telles, 117 - Daniele de Rossi, 37 (pen.)
Baş hakim: Cüneyt Çakır (Türkiyə)
Portu. “Draqau”
İlk oyun – 1:2.
Qeyd edək ki, daha əvvəl Hollandiyanın "Ayaks" və İngiltərənin "Tottenhem" komandaları 1/4 finala yüksəlib.
