AZAL-ın qapıçısı Ruslan Məcidov Topaz Premyer Liqasının son turunda "İnter”ə qarşı oynamayacaq. Bu barədə sportnet.az-a Məcidovun özü məlumat verib.
O, "Bakı” ilə XXXV tur matçında əzələsini dartdığını bildirib. 29 yaşlı qapıçının sözlərinə görə, hələlik həkimlər yekun rəy verməyib. Lakin Məcidov 2 həftəyədək yaşıl meydanlara dönəcəyinə ümid edir: "Düşünmürəm ki, uzun müddət futboldan kənar qalam. Bir, uzağı 2 həftəyə bərpa olacağımı gözləyirəm. Bəlkə də tez”.
Qapıçının uzun müddətədək sıradan çıxması onun karyerasına da təsirsiz ötüşməyə bilər. Çünki qarşıdan yay transfer dövrü gəlir. Üstəlik, Məcidovu AZAL-a komandanın sabiq baş məşqçisi Vaqif Sadıqov dəvət edib. İndi isə "təyyarəçilər”in sükanı arxasında Tərlan Əhmədov yer alıb.
Təcrübəli qapıçı başqa komandaya keçmə variantının olduğunu gizlətməyib: "Növbəti mövsüm harada olacağımı indidən söyləyə bilmərəm. Açığı, 2 yerli klubdan təklif almışam. Lakin hələ ki, gələcək barədə qərar verməyə tələsmirəm”.
