Bu gün Topaz Premyer Liqasının XIX turunda "İnter" klubu "Sumqayıt"ı qəbul edib. Sportnet.az-ın məlumatına görə, qarşılaşmadan sonra "bankirlər"in baş məşqçisi Kaxaber Tsxadadze bunları deyib:
"Yaxşı oyun alındı. Məncə, Türkiyə toplanışından sonra həm özümüz, həm də mətbuat komanda barədə çox danışdıq. Belə demək mümkünsə, gözə gəldik. Penaltini ona görə Yohan vurdu ki, Baçana meydançada yox idi. Penalti vuranların sıralamasında Baçana birincidir. Amma mən penaltini qola çevirə bilməyən Yohanı qınamıram. Belə hallar olur. Komandadan getmə məsələm barədə danışmaq istəmirəm. Çünki mən çempionatın qarşıdakı oyunlarına köklənmişəm”.
Qeyd edək ki, "İnter" - "Sumqayıt" qarşılaşması 0:0 hesabı ilə başa çatıb.
