Futbol üzrə Azərbaycan Premyer Liqasında XXIV tura yekun vurulub.
Sportnet.az-ın məlumatına görə, turun son iki oyununda "Neftçi" səfərdə "Səbail"lə, "Zirə" isə "Sumqayıt"la qarşılaşıb. Hər iki görüş qonaqların 1:0 hesablı qələbəsi ilə başa çatıb.
"ASCO Arena"dakı matçda "ağ-qaralar"ın yeganə qolunu 71-ci dəqiqədə Tiaqo Bezerra vurub. Bu nəticədən sonra xallarını 47-yə çatdıran Samir Abasovun baş məşqçi olduğu komanda həm 2-ci pillədəki mövqeyini möhkəmlədib, həm də sona 4 tur qalmış avrokuboklara vəsiqəni təmin edib. "Dənizçilər" 14 xalla sonuncu - 8-ci sırada qalıb.
Sumqayıtdakı "Kapital Bank Arena"da oynanılan görüşdəki qolun müəllifi isə Davit Volkov olub. Gürcüstanlı hücumçu oyunun əsas vaxtına əlavə olunmuş 1-ci dəqiqədə fərqlənib. Bu qələbədən sonra "Zirə" 42 xalla 3-cü, "gənclik şəhəri" təmsilçisi isə 15 xalla 7-cidir.
Qeyd edək ki, turun açılış matçında "Qarabağ" Qəbələdə eyniadlı komandaya 2:0 hesablı qələbə ilə qalib gəlib. Digər matçda isə "Sabah" "Şamaxı"nı darmadağın edib - 5:1.
--------------------------------------------
Futbol üzrə Azərbaycan Premyer Liqasında XXIV turun daha bir oyunu keçirilib.
Sportnet.az-ın məlumatına görə, "Sabah" klubu "Şamaxı"nı qəbul edib. Masazırdakı "Bank Respublika Arena"da baş tutan qarşılaşma meydan sahiblərinin 5:1 hesablı qələbəsi ilə yekunlaşıb.
Hesabı 11-ci dəqiqədə paytaxt təmsilçisindən Coy-Lens Mikels açıb. 25-ci dəqiqədə Zurab Oçiqava fərqi artırıb. 4 dəqiqə sonra Mikels özünün 2-ci, komandasının 3-cü qolunu vurub. 50-ci dəqiqədə Felipe Santos fərqi azaltsa da, komandası 84-cü dəqiqədə Xulio Sezar Rodrigesin, 5 dəqiqə sonra isə Aleksey İsayevin fərqlənməsinə mane ola bilməyib. Oyunun əsas vaxtına əlavə olunmuş 2-ci dəqiqədə qonaqların müdafiəçisi Franko Flores birbaşa qırmızı vərəqə ilə meydandan qovulub.
Bu qələbə ilə xallarını 35-ə çatdıran "Sabah" turnir cədvəlində "Qəbələ"ni qabaqlayaraq, 4-cü pilləyə yüksəlib. 20 xalı olan "Şamaxı" isə 6-cı sırada qalıb.
Qeyd edək ki, turun açılış oyununda "Qarabağ" Qəbələdə eyniadlı komandanı 2:0 hesabı ilə məğlub edib. Tura hazırda davam edən "Səbail" - "Neftçi" və "Sumqayıt" - "Zirə" görüşləri ilə yekun vurulacaq.
------------------------------------------
Futbol üzrə Azərbaycan Premyer Liqasında XXIV tura start verilib.
Sportnet.az-ın məlumatına görə, açılış oyununda "Qarabağ" Qəbələdə eyniadlı komandanın qonağı olub. Görüş "köhlən atlar"ın 2:0 hesablı qələbəsi ilə başa çatıb.
Ağdam klubundan hər iki qolu İbrahima Vadji vurub. Seneqallı hücumçu 6-cı və 14-cü dəqiqələrdə fərqlənərək, bombardirlik yarışında ikinci pilləyə yüksəlib. Aktivində 10 qolu olan 27 yaşlı forvard "Sabah"ın yarımmüdafiəçisi Coy-Lens Mikelsdən cəmi 1 top geri qalır.
Bu qələbədən sonra xallarını 58-ə çatdıran "Qarabağ" liderliyini möhkəmlədib və çempionluğa bir az da yaxınlaşıb. Bölgə təmsilçisinin ən yaxın izləyicisi "Neftçi" bu gün "Səbail"lə səfər matçında xal itirsə, Qurban Qurbanovun baş məşqçi olduğu kollektiv sona 4 tur qalmış qızıl medalları təmin edəcək. "Qəbələ" isə 35 xalla hələlik 4-cü pillədə yer alıb.
Qeyd edək ki, turun digər oyununda "Sabah" "Şamaxı" ilə qarşılaşır. Tura eyni saatda start götürəcək "Səbail" - "Neftçi" və "Sumqayıt" - "Zirə" görüşləri ilə yekun vurulacaq.
---------------------------------------------
Bu gün futbol üzrə Azərbaycan Premyer Liqasında XXIV turun oyunları keçiriləcək. Sportnet.az-ın məlumatına görə, turun bütün matçları eyni gündə baş tutacaq.
Günün ilk matçında 55 xalla lider olan "Qarabağ" 35 xalla 4-cü sıradakı "Qəbələ"nin qonağı olacaq. "Köhlən atlar" qələbə qazansa, ölkə çempionluğunu vaxtından əvvəl rəsmiləşdirə bilər. Bunun üçün "Neftçi" "Səbail" səfərində xal itirməlidir.
Komandalar ölkə çempionatlarında 53 dəfə üz-üzə gəliblər. Bunların 28-də Ağdam təmsilçisi, 10-da meydan sahibləri qələbə qazanıb. Topların nisbətində də "Qarabağ"ın aşkar üstünlüyü var - 83:43. "Qırmızı-qaralar" Premyer Liqada 15 oyundur qalib gəlmir. Qonaqlar isə son iki səfər görüşündə qol buraxmayıb.
Günün ikinci matçında avrokuboklara iddialı "Sabah" "Şamaxı"nı qəbul edəcək. Paytaxt klubu 32 xalla 5-ci, əyalət təmsilçisi 20 xalla 6-cıdır. Bu, tərəflərin Premyer Liqada 14-cü oyunu olacaq. Əvvəlki 13 qarşılaşmanın 5-də "Şamaxı", 3-də "Sabah" meydanı 3 xalla tərk edib. Topların nisbətində də qonaqlar öndədir - 15:9. "Sabah” son iki matçda qələbə qazanıb. “Şamaxı” səfərdəki bütün oyunlarda qol vurub.
Avrokuboklara digər iddialı komanda "Zirə" "Sumqayıt"la üz-üzə gələcək. "Qartallar" 39 xalla 3-cü, meydan sahibləri 15 xalla 7-ci pillədədir. Komandalar Premyer Liqada 26 dəfə üz-üzə gəliblər. Bunların 13-də paytaxt klubu, 6-da "gənclik şəhəri" təmsilçisi qalib gəlib. Topların nisbətində "Zirə" öndədir - 34:21. Qonaqlar son 3 oyunda qalib gəlib. “Sumqayıt” son 5 qarşılaşmada qol vurmayıb.
Bu tur "Neftçi" avrokuboklara vəsiqəni təmin edə bilər. "Ağ-qaralar" "Səbail"i məğlub edəcəyi təqdirdə istəyinə çatacaq. Son ölkə çempionu 44 xalla ikinci, "dənizçilər" 14 xalla sonuncu - 8-ci yerdədir. "Neftçi" Premyer Liqada rəqibinə 13 dəfə qalib gəlibsə, yalnız 2 dəfə uduzub. 3 matçda isə heç-heçə qeydə alınıb. Topların nisbətində də flaqmanın aşkar üstünlüyü var - 40:11. Neftçi” ardıcıl 7 oyundur qələbə qazanır. “Səbail” son iki oyunda qol vurmayıb.
Azərbaycan Premyer Liqası, XXIV tur
24 aprel (bazar)
17:30. “Qəbələ” – “Qarabağ” - 0:2
Qollar: İbrahima Vadji, 6; 14
Hakimlər: İnqilab Məmmədov, Rahil Ramazanov, Rəhman İmami, Rəşad Əhmədov
Hakim-inspektor: İmanxan Sultani
AFFA nümayəndəsi: Seymur Səlimli
Qəbələ şəhər stadionu
18:30. “Sabah” – “Şamaxı” - 5:1
Qollar: Coy-Lens Mikels, 11; 29. Zurab Oçiqava, 25. Xulio Sezar Rodriges, 84. Aleksey İsayev, 89 - Felipe Santos, 50
Hakimlər: Fərid Hacıyev, Kamran Bayramov, Eyyub İbrahimov, Əliyar Ağayev
Hakim-inspektor: Ceyhun Haşımov
AFFA nümayəndəsi: Aslan Şahgəldiyev
“Bank Respublika Arena”
20:00. “Sumqayıt” – “Zirə” - 0:1
Qol: Davit Volkov, 90+1
Hakimlər: Elçin Məsiyev, Elşad Abdullayev, Pərvin Talıbov, Vüqar Həsənli
Hakim-inspektor: Rövşən Əhmədov
AFFA nümayəndəsi: Rüfət Əmirov
“Kapital Bank Arena”
20:00. “Səbail” – “Neftçi” - 0:1
Qol: Tiaqo Bezerra, 71
Hakimlər: Rəvan Həmzəzadə, Cəmil Quliyev, Vüsal Məmmədov, Rauf Allahverdiyev
Qırmızı vərəqə: Ömər Buludov, 47 ("Neftçi")
Hakim-inspektor: Əmrah İbrahimov
AFFA nümayəndəsi: Bəhram Qurbanov
“ASCO Arena”.
