UEFA Çempionlar Liqasında yarımfinal mərhələsinə start verilib. "Report"un məlumatına görə, ilk oyun günündə 1 qarşılaşma keçirilib.
Gecənin yeganə matçında İspaniya "Real Madrid"i İngiltərədə turnirin son finalçısı "Mançester Siti"nin qonağı olub. "Etihad" stadionundakı görüş "şəhərlilər"in 4:3 hesablı qələbəsi ilə başa çatıb.
Hesabı 2-ci dəqiqədə meydan sahiblərinin yarımmüdafiəçisi Kevin De Brüyne açıb. 93-cü saniyədə fərqlənən belçikalı futbolçu turnirin yarımfinalları tarixində ən erkən qolun müəllifi olub. 9 dəqiqə sonra Qabriel Jezus fərqi artırıb. 33-cü dəqiqədə Kərim Benzema buraxılan qollardan birinin əvəzini çıxıb. 53-cü dəqiqədə Fil Foden qonaqları növbəti dəfə meydanın mərkəzinə dəvət edib. Lakin Mançester təmsilçisinin sevinciu cəmi 3 dəqiqə çəkib. Vinisius Junior baxımlı qolla fərqi yenidən minimuma endirib. 74-cü dəqiqədə Bernardu Silva 4-cü topu "kral klubu"nun qapısından keçirib. Oyunda son nöqtəni isə Benzema qoyub. 81-ci dəqiqədə penaltidən fərqlənən fransalı hücumçu yekun hesabı müəyyənləşdirib.
Komandalar arasında cavab qarşılaşması mayın 4-də olacaq.
-----------------------------------------------
Bu gün UEFA Çempionlar Liqasında yarımfinal mərhələsinə start veriləcək. Sportnet.az-ın məlumatına görə, ilk oyun günündə 1 qarşılaşma keçiriləcək.
Gecənin yeganə matçında İspaniya "Real Madrid"i İngiltərədə turnirin son finalçısı "Mançester Siti"nin qonağı olacaq. "Etihad" stadionundakı görüş Bakı vaxtı ilə saat 23:00-da başlayacaq.
Oyunu rumıniyalı referi İştvan Kovaç idarə edəcək. Ona yan xətt hakimləri Vasile Florin Marinesku və Ovidiu Artene köməklik göstərəcəklər. Dördüncü hakim funksiyasını isə isveçrəli Sandro Şerer yerinə yetirəcək.
"Şəhərlilər"dən Joau Kanselu cəzalı olduğu üçün oynaya bilməyəcək. Kayl Uoker və Con Stounzun isə meydana çıxmaları sual altındadır. "Kral klubu"nda Eden Azar, Luka Yoviç və Mariano Dias zədə səbəbindən matçı buraxacaq. David Alaba və Kazemironun isə bu görüşdə iştirak edib-etməyəcəyi dəqiq bilinmir.
Komandalar arasında cavab qarşılaşması mayın 4-də olacaq.
UEFA Çempionlar Liqası, yarımfinal
İlk oyun
26 aprel
23:00. "Mançester Siti" (İngiltərə) - "Real Madrid" (İspaniya) - 4:3
Qollar: Kevin De Brüyne, 2. Qabriel Jezus, 11. Fil Foden, 53. Bernardu Silva, 74 - Kərim Benzema, 33; 81 (pen.) Vinisius Junior, 55
Baş hakim: İştvan Kovaç (Rumıniya)
Mançester, "Etihad" stadionu
Qeyd edək ki, digər yarımfinal matçı aprelin 27-də İngiltərədə "Liverpul" və İspaniya "Vilyarreal"ı arasında baş tutacaq.