Azərbaycan Dövlət Bədən Tərbiyəsi və İdman Akademiyasının (ASAPES) "İdman menecmenti" və həkimlər üçün “İdman tibbi və reabilitasiya” magistr proqramının tələbələri təcrübə məqsədilə Böyük Britaniyada səfərdədirlər.
ASAPES-dən Sportnet.az-a verilən məlumata görə, "İdman menecmenti"nin tələbələri Böyük Britaniya Olimpiya Assosiasiyasında olublar. Burada Assosiasiyanın Hüquq və Olimpiya Əlaqələri direktoru Şahab Uddinlə görüşən magistrantlara olimpiadalara hazırlıq, təşkilati məsələlər, maliyyə və sponsorluqla bağlı geniş məlumat verilib.
Tələbələr səfər zamanı "Tottenhem Hotspur" stadionuna da baş çəkiblər və onlar infrastrukturla (meydança, geyinib-soyunma otaqları, mətbuat konfransı üçün nəzərdə tutulan zal və s.) yaxından tanışlıq imkanı qazanıblar.
“İdman tibbi və reabilitasiya”nın tələbələri üçün isə tədris prosesi Londonda yerləşən İdman Tibbi İnstitutunda (Institute of Sports, Exercise and Health) həyata keçirilir.
UCL Universitetinin professoru, UCL-in İdman Tibbi İnstitutunun (Institute of Sports, Exercise and Health) aparıcı eksperti, Böyük Britaniyanın Kral Tibb Cəmiyyəti İdman Tibbi Bölməsinin vitse-prezidenti, idman tibbi üzrə Avropa standartının müəllifi, Beynəlxalq Olimpiya Komitəsinin tibbi eksperti Maykl Pol Luzmor magistrantlara yuxarı və aşağı ətraf zədələri, onların reabilitasiyasında istifadə edilən müasir yanaşmalar və bu istiqamətdə aparılan son elmi nailiyyətlər haqqında geniş məlumat verib. Nəzəri məlumatlarla yanaşı, tələbələrin praktiki bacarıqlara yiyələnməsinə də xüsusi diqqət ayrılıb.
Bundan başqa, ASAPES-in rektoru Fuad Hacıyev, Tədris və Elmi işlər üzrə prorektoru Təhminə Tağı-zadə, magistratura şöbəsinin müdiri Nərqiz Kosayeva və “İdman tibbi və reabilitasiya” proqramının koordinatoru Zərifə Kamilova ilə proqram direktoru, professor Maykl Pol Luzmor arasında görüş də təşkil edilib. Görüşdə həmçinin London Kollec Universitetinin tələbəsi, ASAPES və UCL arasında könüllü olaraq əlaqələndirici şəxs kimi çıxış edən Xədicə Quliyeva da iştirak edib.
Qarşılıqlı müzakirələr zamanı tərəflər təcrübə proqramının təşkili və gələcək planlar barədə danışıblar.
