Türkiyənin Manisa vilayətinin Soma bölgəsindəki kömür mədənində baş vermiş faciəyə Azərbaycan klubları da biganə qalmayıblar. Sportnet.az-ın məlumatına görə, bununla bağlı "Qəbələ", "Qarabağ" və "Bakı" klubları başsağlığı mesajı yayımlayıblar.
"Qarabağ"ın rəsmi saytında yazılıb: "Türkiyənin Manisa əyalətinin Soma bölgəsindəki kömür şaxtasında meydana gələn qəza nəticəsində həyatını itirənlərin ailələrinə, yaxınlarına - bütün qardaş ölkəyə "başın sağ olsun" deyirik! Qəzadan yaralı qurtulan şəxslərin tezliklə şəfa tapacaqlarına ümid edirik! Türk xalqının bu ağır günündə onların acılarını paylaşırıq!"
"Bakı"nın başsağlığı mesajında deyilir: "Türkiyənin Manisa əyalətinin Soma şəhərindəki mədəndə baş verən güclü qəza 300-ə yaxın türk qardaşımızın itkisi ilə nəticələndi. Hazırda şaxtada qalan digər işçilərin axtarışı isə davam etdirilir. Klubumuz "Bakı” Futbol Klubu faciə qurbanlarının xatirəsini əziz tutaraq, qardaş Türkiyə Cumhuriyyətinə dərin hüznlə başsağlığı verir. Başımız sağ olun, Türkiyə!”
"Qəbələ” İdman Klubunun kollektivi Türkiyənin Manisa vilayətinin Soma qəsəbəsi ərazisindəki kömür mədənində baş verən qəzada çox sayda insanın həlak olması və yaralanmasından kədərlənir, faciə ilə əlaqədar qardaş ölkənin acı gününə şərik olur. Klubumuz Türkiyə xalqına, həlak olanların ailələrinə və doğmalarına dərin hüznlə başsağlığı verir, yaralananların tezliklə sağlamlığına qovuşmasını arzulayır. Allah rəhmət eləsin!". Bu başsağlığı mətnini isə "Qəbələ" yayıb.
Daha öncə Peşəkar Futbol Liqası Topaz Premyer Liqasında XXXVI tur matçlarının 1 dəqiqəlik sükutla başlamasına qərar verib. "Xəzər Lənkəran"ın baş məşqçisi Mustafa Dənizli isə bugünkü mətbuat konfransında həlak olanların xatirəsini jurnalistlərlə birgə anıb.
Qeyd edək ki, Türkiyənin Manisa şəhərinin Soma bölgəsində mədən qəzası nəticəsində partlayış baş verib və nəticədə 300-dək insan həlak olub.
Sevinc XanQızı
