"Qarabağ" Azərbaycan Premyer Liqasının XXXIV turunda səfərdə "Zirə"ni 1:0 hesabı ilə məğlub edib.
Sportnet.az xəbər verir ki, Ağdam təmsilçisinin baş məşqçisi Qurban Qurbanov matçdan sonra keçirilən mətbuat konfransında jurnalistlərin suallarını cavablandırıb:
- Bu gün bərk komandaya qarşı oynayırdıq. Hansı ki, meydanda yaxşı mübarizə aparırdılar. Birəbir mübarizələri uduzmayan rəqibə qarşı oynadıq. Qələbə olsa da, asan deyildi. Futbolçularım çox əziyyət çəkdilər. Öz oyunumuzu tam istədiyimiz kimi göstərə bilmədik. Futbolçular qələbə üçün xeyli güc sərf etdilər. "Zirə"yə uğurlar arzulayıram.
- Juninyo "Bayer"lə oyundan sonra sanki o qədər də hərəkətli görünmür. Bunu təkliflərlə əlaqələndirirsiniz?
- Hərəkətində geriləmə var. Məşqçi olaraq bunu başa düşürəm. Həm dediyiniz fikirlər, həm də oyunlara motivasiya etmək asan deyil. Nə qədər futbolçuları motivasiya etsək də, onlar özləri də özlərini motivasiya etməyi bacarmalıdırlar. Görünür, tam istədiyim kimi alınmır. Bəlkə də komandaya tam uyğunlaşmayıb. Bizim rejimi, məşq proseslərini, hər oyuna yanaşmağımızı, ola bilər, tam dərk edə bilməyib. İnanın ki, hər şey yaxşılığa doğru gedir. Özü ilə də söhbətimiz olub. Gələn il daha yaxşı Juninyo görmək istəyirik. İnanıram ki, bunu birlikdə bacaracağıq.
- Mövsümü bağlayan zədəli futbolçu var?
- Marko Veşoviçdə zədə daha ciddi görünür. Yassin Benziada gedişata baxacağıq. Həkimlər 10-12 gün deyiblər, amma hər bir halda əzələ məsələsidir. Əzələ elədir ki, tələssən, problem yarana bilər. Ayın 26-dakı oyuna hazır olmaq ehtimalı var. Amma 100 faiz hazır olmasa, risk etməyəcəyik. Çünki böyük ehtimalla milliyə dəvət edəcəklər.
- Müqaviləsi bitən oyunçularla danışıqlar başlamısınız?
- Vaxtımız var. Yüngül danışıqlara başlamışıq. Hər bir halda, sezonun sonunda bilinəcək.
- Komandaya gətirmək istədiyiniz oyunçularla bağlı məsələs nə yerdədir?
- Danışıqlar var. Amma yekunlaşan bir şey yoxdur.
- "Qarabağ" Kadi Borges, Mahir Emreli və Musa Qurbanlını geri qaytarır?
- Heç biri ilə hələ danışığımız yoxdur.
- Avrokuboklar uğrunda 4 komanda mübarizə aparır. Sizcə, hansı daha şanslıdır?
- Hər birinin şansı eynidir. Maraqlı sonluq olacaq. Hər birinə uğurlar arzulayıram.
