Braziliyanın Rio-de-Janeyro şəhərində XXXI Yay Olimpiya Oyunlarının Açılış mərasimi başlanıb. Sportnet.az-ın məlumatına görə, mərasim "Marakana" stadionunda keçirilir.
Tədbiri Beynəlxalq Olimpiya Komitəsinin prezidenti Tomas Bax və Birləşmiş Millətlər Təşkilatının baş katibi Pan Gi Mun da izləyir.
Əvvəlcə stadionda samba səsləndirilib və yüzlərlə avtyor böyük yastıqların köməkliyi ilə baraban effekti yaradıb.
Meydanın ortasında isə ağac yetişməyə başlayıb.
Braziliya himninin sədaları altında ölkənin karyerasını bitirmiş idmançılarının köməyilə Braziliya bayrağı qaldırılıb.
Dünyanın yaranışını əks etdirən səhnə nümayiş olunub.
Məşhur braziliyalı ifaçılar rəqqaslərin müşayiəti ilə mahnılar oxuyublar, kapoeyra rəqsi də unudulmayıb.
Rəqs sədaları altında döyüş səhnələşdirilib. Bir müddət sonra səhnəyə çıxan braziliyalı aktrisa döyüşləri dayandırmağı və ən yaxşısı, insanları birləşdirən rəqs ifasını təklif edib.
***
2016-cı il Rio-de-Janeyro Yay Olimpiya Oyunlarında çıxış edəcək atletlərin keçidi başlanıb. Əvvəlcə Yunanıstan idmançıları azarkeşlər önünə çıxıb.
Əfqanıstan, CAR, Albaniya, Almaniya, Andorra, Anqola, Antiqua və Barbuda, Səudiyyə Ərəbistanı, Əlcəzair, Argentina, Ermənistan, Aruba, Avstraliya, Avstriyadan sonra Azərbaycan nümayəndə heyəti keçid edib.
Azərbaycan bayrağını boks üzrə Avropa çempionu və "Bakı 2015" I Avropa Oyunlarının qalibi Teymur Məmmədov daşıyıb.
***
Olimpiadadan kənarlaşdırılmış Küveyt dövlətinin idmançıları azarkeşlər önündən Beynəlxalq Olimpiya Komitəsinin bayrağı ilə keçiblər. Argentina nümayəndə heyəti isə fitə basılıb.
Avstraliyalı idmançıların formalarında isə ölkənin bütün olimpiya çempionlarının adları yazılıb.
Yunanıstanın bayraqdarı ölkə tarixində ilk dəfə qadın olub. Ellada bayrağını daşıma şərəfinə Sofiya Bekatoru layiq görülüb. O, 2004-cü il Afina Yay Olimpiya Oyunlarında Emiliya Tsulfa ilə duetdə qızıl, 2008-ci il Pekin olimpiadasında isə bürünc medal qazanıb.
***
207 nümayəndə heyətinin keçidi təşkilatçı Braziliya idmançılarından sonra yekunlaşıb. Parad zamanı idmançılar xüsusi şüşə qutulara 11 min toxum əkiblər.
Toxumların olduğu qutulardan yaşıl rəngdə olimpiya halqası yaradılıb. Onlar sonradan irs kimi Deodoro parkında əkiləcəklər. Ümumilikdə hər nümayəndə heyətinə biri olmaqla, 207 ağac növü əkiləcək.
Bundan sonra rəsmi hissə başlanıb. Səhnəyə "Rio-2016" Təşkilat Komitəsinin prezidenti Karlos Artur Nuzman və İOC prezidenti Tomas Bax çıxıb.
***
Nuzman çıxışında böyük arzunu həyata keçirdiklərini, bundan özünü çox xoşbəxt və dünyanın ən qürurlu insanı saydığını bildirib. Bax isə azarkeşləri portuqalca salamladıqdan sonra hər bir braziliyalının bu gecədən qürur hissi keçirməli olduqlarını söyləyib. O, 7 ilə Rio-de-Janeyronun müasir meqapolisə çevrildiyini, daha gözəl və əsrarəngiz olduğunu vurğulayıb. İOC rəhbəri böhran və inamsızlığın hökm sürdüyü dünyada yaşadıqlarını söyləyərək, dünyada yaşayan milyonlarla qaçqının timsalında olimpiadada çıxış edəcək qaçqınlar komandasına müraciət edib. Almaniyalı sabiq olimpiya çempionu atletlərə özlərinə, bir-birilərinə, olimpiya dəyərlərinə hörmət etməyi arzulayıb.
Olimpiya hərəkatının inkişafı sahəsindəki nailiyyətlərinə görə, olimpiya çempionu Kipçoqe Keqnoya xüsusi mükafat təqdim olunub.
Braziliya prezidenti Mişel Temer XXXI Yay Olimpiya Oyunlarını açıq elan edib.
Səhnəyə Braziliyanın məşhur idmançıları olimpiya bayrağı gətiriblər.
Stadionda olimpiya himni səsləndirilib.
***
Braziliyalı atlet Robert Şeyt idmançılar, Martino Nobre hakimlər və rəsmi şəxslər, Adriana Santuş məşqçilər adından and içiblər.
***
Dünyanın keçmiş bir nömrəli tennisçisi Qustavo Kuerten və digər məşhur braziliyalı idmançılar stadiona olimpiya məşəli gətiriblər. Məşəli isə marafonçu Vanderley Kordeyru yandırıb. Beləliklə, Açılış mərasimi yekunlaşıb.
