"Oyunumuz çətin keçdi. Rəqib güclü, yaxşı komandadır. Bizə xeyli çətinliklər yaşatdı. Xoşbəxtlikdən rəqibin qol vurmaq cəhdləri alınmadı". Sportnet.az-ın məlumatına görə, bunu "Qəbələ"nin heyətində ilk qolunu "Kəpəz"lə Azərbaycan Premyer Liqasının III tur matçında vuran Ermin Zets klubun rəsmi saytına açıqlamasında deyib.
Bosniya və herseqovinalı futbolçunun fikrincə, matçın çətin alınması daha çox tarixi əhəmiyyət kəsb edən Yunanıstan "Panatinaikos”u ilə Avropa Liqasının "pley-off" mərhələsindəki cavab matçını düşünmələri ilə bağlı ola bilər: "Vurduğum qol "Kəpəz”lə qarşılaşmanın taleyini həll etdi. Komandamda qol hesabımı açdığım üçün xoşbəxtəm. Ümid edirəm ki, bu hələ başlanğıcdır və qollarımın davamı gələcək. Amma hər şeydən vacib olan komandamızın qələbəsidir”.
Bosniya və Herseqovina millisinin AVRO-2016-nın sentyabrda keçiriləcək seçmə oyunlarına dəvət alan futbolçu "Qəbələ”nin növbəti oyunu haqda da danışıb: "Panatinaikos”la cavab qarşılaşmasında çox çətin oyun olacaq. Rəqib favorit sayılsa da, inanıram ki, biz də yaxşı oyun göstərəcəyik. Mərhələ keçmək üçün özümüzə inanmalı və bacarığımızın 100 faizini meydanda qoymalıyıq”.
Qeyd edək ki, "Qəbələ" "Kəpəz"i 1:0 hesabı ilə yenib. "Panatinaikos"la ev oyunu isə qolsuz tamamlanıb. Cavab görüşü avqustun 27-də Afinada olacaq.
