Avropa Liqasının qrup mərhələsində çıxış edən "Qarabağ" və "Qəbələ" klubları Avropa Klubları Assosiasiyasının (ECA) xeyriyyə aksiyasına qoşulub. Sportnet.az-ın məlumatına görə, aksiya qaçqın həyatı yaşayan vətəndaşlara dəstək olmaq və ehtiyacı olan insanlara köməklik göstərmək üçün nəzərdə tutulub.
ECA-nın sentyabrın 8-də Cenevrədə keçirilmiş iclasında bu barədə qərar qəbul edilib. Təklif assosiasiyanın üzvü olan "Porto" (Portuqaliya) klubu tərəfindən irəli sürülüb. Qəbul olunan qərara əsasən Avropa Klublar Birliyi UEFA Çempionlar Liqası və UEFA Avropa Liqası 2015/2016 mövsümünün qrup mərhələsinin iştirakçılarından ilk ev oyununda satılacaq hər biletdən 1 avro ianə verəcək.
Sözü gedən layihə "90 Minutes For Hope" şüarı altında keçiriləcək. İanələr Avropa Klublar Birliyinin müəyyən etdiyi "90 Minutes For Hope” bank hesabında toplanacaq. Fondun əməkdaşlıq edəcəyi təşkilatlar bu vəsaitin ehtiyacı olan insanlara çatdırılmasına yardım edəcək.
ECA tərəfindən başlanılan hərəkata Avropa miqyaslı yarışlarda iştirak etməyən klublar da könüllü olaraq qoşula bilərlər.
