Bu gün futbol üzrə Rusiya Kubokunun 1/16 final mərhələsinin ilk oyunları keçiriləcək. Sportnet.az-ın məlumatına görə, Azərbaycan millisinin sabiq futbolçusu Emin Ağayevin baş məşqçi kimi çalışdığı Tver "Volqa"sı öz meydanında Rusiya çempionu "Zenit"i qəbul edəcək.
Tverdəki "Ximik" stadionunda baş tutacaq görüşün start fiti Bakı vaxtı ilə saat 17:00-da çalınacaq. "Qəbələ"nin Avropa Liqasının qrup mərhələsindəki rəqibi "Krasnodar" isə sentyabrın 24-də "Zenit" (İjevski) komandasının qonağı olacaq. Növbəti mərhələyə vəsiqələrin sahibi bir oyunun nəticəsində müəyyənləşəcək. Yəni, cavab görüşü olmayacaq.
Qeyd edək ki, Emin Ağayev Tver "Volqa"sına bu ilin fevralında baş məşqçi təyin olunub. 42 yaşlı mütəxəssisin komandası hazırda Rusiya çempionatının II divizionunda "Qərb" zonasında çıxış edir. Hazırda klub 9 oyundan 19 xalla ikinci pillədə yer alıb.
