Ramin Musayev: "Həqiqəti nə siz bilirsiniz, nə də mən" - MÜSAHİBƏ

2 iyul yalnız Beynəlxalq İdman Jurnalistləri üçün deyil, həm də Peşəkar Futbol Liqası (PFL) üçün əlamətdar gündür. Eyni tarixdə PFL-in 6 yaşı tamam olur. Bu münasibətlə qurum rəhbəri Ramin Musayev Sportnet.az saytına müsahibə "hədiyyə edib".

- 6 il PFL və Ramin Musayev üçün necə keçdi?
- Özümüzü tərifləmək düzgün çıxmaz, amma çalışırıq ki, nəsə edək. Əgər bir şey edə bilmişiksə, bunu özümüz üçün uğur sayırıq. Həyat davam edir və çalışırıq ki, ildən ilə yeniliklər olsun. Futbolun inkişaf etməsi üçün çalışırıq.

- Bu illər ərzində rəhbərlik etdiyiniz qurumdan getmək istədiyiniz an olub?
- Yox, həyat mübarizədir. Mən də mübarizə aparmağı sevirəm.

- Bəs bu müddət ərzində PFL prezidenti olduğunuz üçün qürurlandığınız an olub?
- Bəli, 108-ci yerdən 43-cü pilləyə gəlmişik. Nə qədər ki, 30-luğa düşməmişik, bizim qürurlanmağa ixtiyarımız yoxdur.

- Qeyd etdiniz ki, 30-luğa düşə bilməmiş qürurlanmağa ixtiyarımız yoxdur. Həmin 30-luğa düşə bilməyən ölkənin 2 təmsilçisi - "İnter" və "Qəbələ" sabah Avropa Liqasında mübarizəyə başlayacaq. Bu haqda nə deyə bilərsiniz?
- Düşünürəm ki, çətin olacaq. Ancaq sabahkı oyunlardan, xüsusilə də "Qəbələ"dən qələbə gözləyirəm.

- Yalnız "Qəbələ"dən?
- Bəli.

- Bəs "İnter"dən qələbə gözləmirsiniz?
- "İnter" rəqib meydanında oynayır. Səfərdən 1 topla dönsə də yaxşıdır. Məhsuldar heç-heçə etsələr, lap əla.

- "Bakı" ilə bağlı fikirlərinizi öyrənmək istəyərdim. Paytaxt klubunun dağılacağı gözlənilir...
- "Bakı" dağıla bilməz! "Bakı"nın rəhbərləri iş başındadır. Bu gün Yaşar Seyidov yanımda olub. Klubla bağlı heç bir problem yoxdur. Komanda hazırda məşqlərə çıxır. İnşallah tez bir zamanda daha yaxşı olacaq.

- Premyer Liqada iştirak üçün maliyyə təminatı olmalıdır. "Bakı" həmin təminatı verə biləcək? Çünki "Lans" da buna görə Liqa 1-ə yüksələ bilmədi...
- Biz "Lans" və başqa klubdan danışmayaq. Çünki həqiqətin nədən ibarət olduğunu nə siz bilirsiniz, nə də mən. Gəlin öz klubumuzla maraqlanaq. "Bakı"da heç bir problem yoxdur. Mən bununla bağlı klub rəhbərləri ilə də maraqlandım və müsbət cavab aldım. İnanıram ki, tez bir zamanda əvvəlki "Bakı"nı görərik.

- Premyer Liqanın püşkatması ilə bağlı hansı yeniliklər var? Püşkatmanın tarixi müəyyənləşib?
- Bu ayın ortalarında olacaq. Hələ ki, dəqiq tarixi bilinmir.

Ceyhun ƏLİYEV