Azərbaycanın qadın voleybolçulardan ibarət "Lokomotiv", "Azərreyl" və "Telekom" klubları bu gün Çempionlar Liqasında növbəti oyunlarını keçirib. Sportnet.az-ın məlumatına görə, bu komandalardan ikisi bir-birinə qarşı mübarizə aparıb.
A qrupunda "Lokomotiv" "Azərreyl"lə münasibətlərinə aydınlıq gətirib. Voleybol Mərkəzində baş tutmuş qarşılaşmada "Lokomotiv" nominal meydan sahibi qismində çıxış edib. "Lokomotiv" qrupun ilk görüşündə səfərdə Rusiyanın "Dinamo" (Kazan) komandasına 1:3 hesabı ilə məğlub olubsa, "Azərreyl" Bakıda "Ştutqart"a 3:0 hesabı ilə qalib gəlib. Bu dəfə qələbəni nominal meydan sahibləri qazanıb - 3:1. Beləliklə, "Lokomotiv" qrupda ilk qələbəsinə imza atıb. Qrupun digər oyununda "Ştutqart" "Dinamo"ya uduzub - 0:3 (17:25, 20:25, 22:25). Hazırda "Dinamo"nun 6, "Lokomotiv" və "Azərreyl"un 3 xalı var. "Ştutqart" isə xalsızdır.
E qrupundakı "Telekom" Türkiyədə "Fənərbağça"nın qonağı olub. Bu oyunadək Bakı təmsilçisi doğma azarkeşlər önündə Polşanın "İmpel" klubuna 0:3 hesabı ilə məğlub olmuş, "Fənər" isə Almaniya "Drezdner"ini səfərdə yenmişdi - 3:1. "Telekom" İstanbuldakı qarşılaşmada ilk 2 seti üstün tamamlasa da, sonrakı 2 setdə qələbəni əldən verib. Nəticədə görüşün taleyi "tay-breyk"də həll olunub. Bu zaman meydan sahibləri çətinlik çəkmədən qalib gəliblər. Nəticədə "Fənərbağça" 2, "Telekom" isə ilk xalını qazanıb. Qrupun digər matçında Almaniya "Drezdner"i Polşada "İmpel"i yenib - 3:2 (25:17, 23:25, 24:26, 25:21, 15:13). Beləliklə, 2 turdan sonra "Fənərbağça" 5 xalla liderdir, "İmpel" 4, "Drezdner" 2, "Telekom" 1 xalla sonrakı yerləri bölüşdürür.
Çempionlar Liqası, qrup mərhələsi, II tur
18:00. "Lokomotiv" - "Azərreyl" - 3:1 (25:14, 22:25, 25:21, 25:21)
Hakimlər: Mirko Yankoviç (Serbiya), Yuri Bakunoviç (Belarus)
Bakı. Voleybol Mərkəzi.
21:00. "Fənərbağça" - "Telekom" - 3:2 (21:25, 22:25, 25:22, 25:11, 15:6)
Hakimlər: Harald Sodya (Avstriya), Andjelko Popoviç (Serbiya)
Qeyd edək ki, qruplarda III turun oyunları 24 - 26 noyabrda keçiriləcək.
