Fransanın PSJ klubunun yarımmüdafiəçisi Marko Verratti 2015-ci ildə İtaliya yığmasının ən yaxşı futbolçusu seçilib. Sportnet.az-ın məlumatına görə, 24 yaşlı oyunçu xüsusi səsvermədə 29 faiz səs yığıb.
"Yuventus"un qapıçısı Canluici Buffon 26 faiz səslə ikinci, "Latsio"nun cinah oyunçusu Antonio Kandreva 21 faiz səslə üçüncü olub.
Qeyd edək ki, 2014-cü ilin ən yaxşı futbolçusu hazırda İngiltərə "Mançester Yunayted"ində forma geyinən Matteo Darmian olub. İtaliya millisi AVRO-2016-nın seçmə mərhələsində Azərbaycanla eyni qrupda yer alıb. Qrup lideri kimi mərhələ adlayan "Skuadra Adzurra"nın Fransada keçiriləcək Avropa çempionatındakı rəqibləri Belçika, İrlandiya və İsveç olacaq.
