"Qəbələ"nin baş məşqçisi Roman Qriqorçuk öz adından Azərbaycandakı stadionların durumundan narazı olmasına dair Latviya mətbuatında yer alan açıqlamanı xeyli təəccüblə qarşılayıb. Sportnet.az-ın məlumatına görə, bu barədə ukraynalı mütəxəssis klubun rəsmi saytına açıqlamasında bildirib.
O, xarici mətbuatda yazılanların həqiqəti əks etdirmədiyini söyləyib: "Həqiqətən də mənim Azərbaycandakı stadionlarla bağlı fikrimi bilmək istəyirsinizsə, bunları deyə bilərəm: Bakıdakı stadionlar dünya standartlarına tam cavab verir. Bu, mübahisəyə ehtiyacı olmayan faktdır. O ki qaldı ölkə çempionatında çıxış etdiyimiz arenalara, demək olar ki, bütün komandaların yüksək səviyyəli stadionu var. Xüsusilə, "Bakcell Arena" mənim çox xoşuma gəlir. Bakıda nəinki stadionlar, ümumiyyətlə, idman arenaları ən xoş sözlərə layiqdir. Bunu burada olan bütün insanlar təsdiqləyə bilər".
Qriqorçuk bildirib ki, onu stadionlarla bağlı narahat edən yeganə məqam bəzi süni örtüklü meydançaların durumudur: "Bu da təbii ki, bütün stadionlara aid deyil. Öz stadionumuza gəlincə, kifayət qədər gözəl arenamız var, istədiyimiz tam şərait yaradılıb, infrastruktur ideal səviyyədədir. Bu məsələni klub rəhbərliyi ilə heç vaxt müzakirə etməmişəm".
